პროკურატურის განცხადებით, სასამართლოს დღევანდელ გადაწყვეტილებას სააპელაციოში გაასაჩივრებს. უწყება არ აკონკრეტებს განაჩენის რომელი ნაწილითაა უკმაყოფილო. მათი თქმით, სააპელაციოს კანოით დადგენილ ვადაში მიმართავენ.

საქალაქო სასამართლომ, რუსთავი 2-ისთვის 6 763 509 ლარის ზიანის მიყენების საქმეზე, ტელეკომპანიის ყოფილი გენერალური დირექტორი ნიკა გვარამია დამნაშავედ ცნო.

"ამ ნაწილში, თბილისის საქალაქო სასამართლომ სრულად გაიზიარა ბრალდების მხარის მიერ წარდგენილი მტკიცებულებები, თუმცა არ დაეთანხმა ბრალდების მხარის შეფასებას ჩადენილი დანაშაულის სამართლებრივ კვალიფიკაციაში, რის გამოც ბრალდებულის ქმედება დაკვალიფიცირდა სამეწარმეო ორგანიზაციაში უფლებამოსილების ბოროტად გამოყენებად, სისხლის სამართლის კოდექსის 220-ე მუხლით, ნაცვლად ამავე კოდექსის 182-ე მუხლისა. ამ ნაწილში, გვარამიას სასჯელის სახედ და ზომად განესაზღვრა ჯარიმა 50 000 ლარის ოდენობით", — წერს პროკურატურა.

რაც შეეხება დანარჩენ ორ ბრალდებულს — სასამართლომ ზურაბ იაშვილი გაამართლა და გააუქმა, როგორც გირაო, ასევე, ქონებაზე დადებული ყადაღა. ხოლო კახა დამენიას მუხლი გადაუკვალიფიცირეს და სასჯელის სახედ და ზომად 50 000 ლარი განუსაზღვრეს.

სასამართლოს გადაწყვეტილების გასაჩივრებას გეგმავს დასვის მხარე. გვარამიას ადვოკატის, დიმიტრი საძაგლიშვილის თქმით, არც იქ აქვთ სამართლიანი გადაწყვეტილების მოლოდინი.

განაჩენის გამოცხადების შემდეგ, სასამართლო დარბაზიდან გვარამიამ დაპოსტა და მოუწოდა ხალხს დარჩნენ მთავარ არხზე და ერთად მოიპოვონ თავისუფლება. არხის ჟურნალისტებმა კი განაცხადეს, რომ ბრძოლა გრძელდება, უფრო მეტად, ვიდრე აქამდე.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

ამავე თემაზე: