გიული ალასანიამ მიხეილ სააკაშვილი ვივამედში მოინახულა. მისი თქმით, ექსპრეზიდენტი ძალიან სუსტადაა. ალასანია ამბობს, რომ მან ორი დღის სააკაშვილი პენიტენციურ დაწესებულებაში ინახულება, თუმცა ახლა მისი მდგომარეობა უფრო მძიმეა.

"2 საათი გავატარე, ჯანმრთელობის მდგომარეობას მთლიანად მე, რა თქმა უნდა, ვერ შევაფასებ. 2 დღის წინ მყავდა ნანახი ციხეში, იმასთან შედარებით ბევრად უარესად იყო, თვალშისაცემად. ფერი საერთოდ არ ჰქონდა, თვალები მეტკინა უბრალოდ, რომ შევხედე, თეთრი იყო. სიარული ძალიან უჭირდა დღეს. ვიფიქრე, შეიძლება იმიტომ, რომ ჩვენც ხომ არ გვეძინა ღამე და იქნებ, ისიც ასეთ მდგომარეობაში იყო, მაგრამ მითხრა, არა, მეძინაო, არ ვიცი. რატომღაც, სიარულითაც, აი, ძლივს დადის. გუშინ კიდევ სამჯერ დავეციო, მითხრა. ერთი სიტყვით, საშინელი სისუსტე აქვს", — განაცხადა მან.

ალასანიას თქმით, სააკაშვილს გამოკვლევები ჩაუტარდა, თუმცა აღნიშნავს, რომ ეს საკმარისი არ არის და ექსპრეზიდენტს ინტენსიური მკურნალობა სჭირდება. სააკაშვილის დედა, ასევე, ამბობს, რომ კლინიკის პერსონალით კმაყოფილია.

"ჩაუტარდა ანალიზები, პასუხები მე არ ვიცი, შეიძლება არც იყო ჯერ. უნდა დავაკვირდეთო. როდემდე გაჩერდება არ ვიცი, მაგრამ ზუსტად ვიცი, რომ საჭიროა ადამიანის აქედან გაყვანა. იმიტომ, რომ ეს გამოკვლევები, ანალიზები და დაკვირვება არ იქნება საკმარისი, მას სჭირდება ინტენსიური მკურნალობა, გადარჩენაზეა", — დასძენს ის.

გუშინ, 11 მაისს გავრცელდა ინფორმაცია, რომ სააკაშვილი ვივამედში გადაჰყავდათ. შესაბამის უწყებებს ოფიციალური განცხადება ამ დრომდე არ გამოუქვეყნებიათ. ამასთან, სხვადასხვა მედიის კადრებში ჩანდა, რომ ტერიტორიაზე პოლიციელები იყვნენ მობილიზებული. On.ge პენიტენციურ სამსახურთან ცდილობდა დაკავშირებას, თუმცა ისინი ზარებს არ პასუხობდნენ.

10 მაისს იუსტიციის მინისტრმა, რატი ბრეგაძემ განაცხადა, მიხეილ სააკაშვილს, შესაძლო გართულებების თავიდან არიდების მიზნით, შესთავაზებდნენ, რომ გადაიყვანონ კლინიკა ვივამედში, სადაც მას გამოკვლევებს ჩაუტარებენ. ამავე დღეს სააკაშვილმა კლინიკაში გადასაყვანად რამდენიმე პირობა დაასახელა.

ამავე თემაზე: