უკრაინის ეროვნული გვარდია აცხადებს, რომ უკრაინის სრული ხელმძღვანელობა ახლა ეძებს გზებს, რათა აზოვსტალი გადაარჩინოს და იქ დარჩენილების ევაკუაცია განახორციელოს. ამის შესახებ ეროვნული გვარდია განცხადებას Facebook-ზე ავრცელებს.

"პირადად უკრაინის პრეზიდენტი და ყველა სახელმწიფო ლიდერი ცდილობს იპოვოს შესაძლებლობა, რომ აზოვსტალიდან მოქალაქეების ევაკუაცია განახორციელოს და გააგრძელოს მუშაობა დაჭრილი ჯარისკაცების, მედიკოსებისა და სამხედროებისთვის "გამოყვანის" პროცედურის გამოყენებაზე, მათ შორის, მსოფლიო საზოგადოების დახარებით.

მათი თქმით, უკრაინაში რუსეთის სრულმასშტაბიანი შემოჭრის ორ თვეზე მეტი ხნის განმავლობაში, მარიუპოლი დაუძლეველობის, გამბედაობისა და გმირობის სიმბოლო გახდა. ის, ასევე, მარადიული სირცხვილია რუსეთისთვის, რომელიც მარიუპოლის დედამიწიდან წაშლას ცდილობს.

"ისინი ყველანი გმირები არიან. ყველა მათგანი უნდა გადარჩეს — და ეს არის ერთ-ერთი მთავარი ამოცანა, რომელიც უნდა გადაიჭრას არა მხოლოდ ბრძოლის ველზე, არამედ საერთაშორისო დონეზეც", — ვკითხულობთ განცხადებაში.

დღეს აზოვის პოლკის მეთაურის მოადგილემ, კაპიტანმა სვიატოსლავ პალამარმა განაცხადა, რომ აზოვსტალის ქარხანაში დაჭრილი სამხედროები არიან, თუმცა საავადმყოფოსთან კავშირი არ აქვთ და მათ ევაკუაციას ვერ ახერხებენ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში