პრემიერმა გიორგი კვირიკაშვილმა რუსთავი 2-ის საქმესთან დაკავშირებით განაცხადა, რომ მას ადამიანური წყენა აქვს რუსთავი 2-ის მუშაობასთან და მის გენერალურ დირექტორთან, თუმცა სურს რომ ის ძველი შემადგენლობით იხილოს, რათა "ვინმეს სპეკულაციის საფუძველი არ გაუჩნდეს":

"არაერთხელ გამოვთქვი ჩემს სურვილი, რომ არ მსურდა მეხილა რუსთავი 2 შეცვლილი სახით და მიმეცა ამისთვის ვინმესთვის სპეკულირების საშუალება, მითუმეტეს წინასაარჩევნო პერიოდში. ესაა ჩემი სურვილი. სასამართლო არის სასამართლო, ის იხილავს საკუთრების საკითხს და ეს არის სამოქალაქო პროცესი, ჩვენ აქ ჩარევის არანაირი უფლება არ გაგვაჩნია, თუმცა კიდევ ერთხელ ვადასტურებ, რომ ჩემი სურვილია სალაპარაკო ამითი არავის არ მიეცეს. რამდენად მოხდება რაიმე ცვლილება ან არ მოხდება, ამას მე წინასწარ ვერ გეტყვით, მაგრამ მე შემიძლია კიდევ ერთხელ დაგიდასტუროთ არანაირი ცვლილება [მინდა მოხდეს]".

პრემიერის თქმით, მას აქვს ადამიანური პრეტენზიები და წყენა რუსთავი 2-ის მიმართ, თუმცა ეს დემოკრატიისთვის ჩვეულებრივი მოვლენაა:

"ეს ადამიანურია, ხანდახან წარმატება არ წარმოჩინდება, ხანდახან მხოლოდ უარყოფითის გაშუქება ხდება, მაგრამ ეს არის ჩვეულებრივი მოვლენა დემოკრატიისთვის და მე არავითარი პრეტენზია არ შეიძლება მქონდეს კერძო ტელევიზიისადმი, როგორც პრემიერმინისტრს, მიუხედავად იმ შეურაცხყოფებისა, რომლებსაც ამ ტელევიზიის გენერალური დირექტორი ჩვენს ინსტიტუციებს აყენებს.

ჩვენი მოსახლეობა ამას უყურებს, რომ ადამიანი რომელსაც ნამდვილად არ უნდა ჰქონდეს დღეს ასეთი საუბრის გონორი, სამწუხაროდ ასე საუბრობს. ადამიანი რომელიც იყო ერთერთი შემოქმედი ყველაფერი იმის, რაც 2007 წელს ხდებოდა.

მე ვემხრობი რუსთავი 2 დარჩეს ისეთი, როგორიც არის და დირექტორად ჰყავდეს ნიკოლოზ გვარამია, არანაირ საშიშროებას ის ჩვენთვის არ წარმოადგენს, კიდევ ერთხელ ხაზგასმით ვამბობ".

თბილისის სააპელაციო სასამართლოში რუსთავი 2-ის საქმის განხილვა მიმდინარეობს, საიდანაც ახალი ამბები შეგიძლიიათ ჩვენს LIVE განახლებად გვერდზე იხილოთ.