მარიუპოლის მცველები უარყოფენ ინფორმაციას, რომ აზოვტსალიდან ოკუპანტები გააძევეს და აცხადებენ, რომ იქ ბრძოლები გრძელდება. აზოვის ბატალიონის მეთაურის მოადგილე, სვიატოსლავ პალამარი დაჭრილ ჯარისკაცებზე ზრუნვას და ცხედრების გატანის შესაძლებლობას ითხოვს.

"პირადად მივმართავ უმაღლეს მთავარსარდალს, იზრუნოს დაჭრილ ჯარისკაცებზე, რომლებიც საშინელი ტანჯვით იღუპებიან, სათანადო მკურნალობის არარსებობის გამო. მოგვეცით საშუალება, გავიტანოთ მებრძოლთა ცხედრები, რომ უკრაინელებმა შეძლონ, დაემშვიდობონ საკუთარ გმირებს.

მოახდინეთ შესაბამისი რეაგირება კრიტიკულ სიტუაციაზე, რომელშიც მოწინააღმდეგე არ იცავს არანაირ ეთიკურ ნორმას, კონვენციას ან კანონს. ანადგურებს ხალხს მთელი მსოფლიოს თვალწინ და ხელმძღვანელობს დაუსჯელობით", — აღნიშნა მან.

დღეს უკრაინის პრეზიდენტის ადმინისტრაციის უფროსის მრჩეველმა ალექსეი არესტოვიჩმა განაცხადა, რომ უკრაინელმა სამხედროებმა აზოვსტალში მტერი მოიგერიეს.

4 მაისს გავრცელდა ინფორმაცია, რომ რუსი სამხედროები აზოვსტალის ქარხანაში შეიჭრნენ. ამას კრემლი უარყოფს და ამტკიცებს, რომ იქ ხუთშაბათს ჰუმანიტარული დერეფნები ფუნქციონირებდა.

21 აპრილს, მას შემდეგ, რაც სერგეი შოიგუმ ვლადიმერ პუტინს უთხრა, თითქოს მარიუპოლი აიღეს და მხოლოდ აზოვსტალის ინდუსტრიული ზონის შტურმიღა რჩებოდათ, პუტინმა ეს გეგმა დაიწუნა. მან ბლოკადის გაგრძელება მოითხოვა და ამტკიცებდა, ვითომ ეს რუსი ჯარისკაცების ჯანმრთელობასა და სიცოცხლეზე ზრუნვის გამო გადაწყვიტა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში