უკრაინის პრეზიდენტის ადმინისტრაციის უფროსის მრჩეველმა ალექსეი არესტოვიჩმა განაცხადა, რომ უკრაინელმა სამხედროებმა აზოვსტალში მტერი მოიგერიეს.

"შეგვიძლია ვთქვათ, რომ გუშინ რუსული ჯარები შევიდნენ აზოვსტალის ტერიტორიაზე და ჩვენმა დამცველებმა ისინი მოიგერიეს", — ამბობს ის.

არესტოვიჩის თქმით, ბევრი ურთიერთგამომრიცხავი ინფორმაცია ვრცელდება. როგორც ის ამბობს, ბრძოლა კვლავ მიმდინარეობს, სხვა ინფორმაციები კი ზუსტდება.

არესტოვიჩის განცხადებით, არ არსებობს იმის ნიშანი, რომ რომელიმე სამოქალაქო პირმა შეძლო ქარხნის ნანგრევების დატოვება ხუთშაბათს, მიუხედავად იმისა, რომ რუსეთის თავდაცვის სამინისტრო დღეს ჰუმანიტარული დერეფნების გახსნას ამტკიცებდა.

4 მაისს გავრცელდა ინფორმაცია, რომ რუსი სამხედროები აზოვსტალის ქარხანაში შეიჭრნენ. დღის ბოლოს აზოვის პოლკის მეთაურმა, დენის პროკოპენკომ განაცხადა, რომ აზოვსტალში მდგომარეობა უკიდურესად მძიმეა, თუმცა ჯარისკაცები ბრძანების შესრულებას აგრძელებენ და დაცვას ინარჩუნებენ.

კრემლი უარყოფს, რომ რუსეთის ჯარები აზოვსტალის ქარხანაში შეიჭრნენ და ამტკიცებენ, რომ იქ ხუთშაბათს ჰუმანიტარული დერეფნები ფუნქციონირებდა.