ბორჯომმა 49 თანამშრომელი სამსახურიდან გაათავისუფლა. კომპანიაში ამბობენ, რომ შექმნილ ვითარებაში იძულებული გახდნენ დასაქმებულთა ხელშეკრულებაში ცვლილება შეეტანათ, რაზეც თანამშრომელთა ნაწილი არ დათანხმდა.

"მოგეხსენებათ, ჩვენი კომპანია დღეს დგას უდიდესი გამოწვევის წინაშე. ყველაფერს ვაკეთებთ იმისთვის, რომ პირველ რიგში გადავარჩინოთ კომპანია და მაქსიმალურად შევინარჩუნოთ სამუშაო ადგილები. შექმნილ ვითარებაში იძულებული გავხდით ცვლილება შეგვეტანა, დასაქმებულთა ხელშეკრულებებში, რადგან კომპანიას აღარ აქვს ქარხანაში მოცდენილი საათების 100%-ით ანაზღაურების შესაძლებლობა.

სწორედ ამიტომ შევთავაზეთ თანამშრომლებს განახლებული პირობები (რაც გულისხმობს, მოცდენილი საათების 50%-ით ანაზღაურებას — ნამუშევარი საათების ანაზღაურება რჩება უცვლელი), რაც სამწუხაროდ თანამშრომელთა მცირე ნაწილისთვის მისაღები არ აღმოჩნდა, რის გამოც იძულებული გავხდით, ქარხანაში დაგვეწყო რეორგანიზაციის პროცესი და 49 თანამშრომლისათვის კანონმდებლობის საფუძველზე შეგვეწყვიტა ხელშეკრულებები", — აცხადებს კომპანია.

ბორჯომის თქმით, იმედოვნებენ, რომ თანამშრომლების შემცირებები აღარ მოუწევთ.

29 აპრილიდან სანქციების გამო კომპანია ბორჯომი ორივე ქარხანაში წარმოებას დროებით აჩერებს. ბორჯომში აცხადებენ, რომ კომპანია დღემდე "სიტუაციის არსებითი გამოსწორების იმედით" აგრძელებდა ფუნქციონირებას, რაც ამ დრომდე ვერ მოხერხდა.