მარიუპოლის მერის, ვადიმ ბოიჩენკოს განცხადებით, ოკუპანტებმა მარიუპოლიდან რუსეთში იძულებით თითქმის 40 000 ადამიანი გადაასახლეს. მისი თქმით, ამ დროისთვის ყველაფრის გადამოწმება და ინფორმაციის მიღება არ შეუძლიათ.

"ჩვენ უკვე გადავამოწმეთ იმ ადამიანების სიები, რომლებიც რუსებმა მარიუპოლიდან იძულებით გადაასახლეს რუსეთში ან ე.წ დონეცკის რესპუბლიკაში. თითქმის 40 000 ადამიანი. მათ ახლა ამ სიების დამალვა დაიწყეს. სამწუხაროდ, ახლა ყველაფრის შემოწმება არ შეგვიძლია, მაგრამ მუშაობას ვაგრძელებთ", — ციტირებს მერს CNN.

მერის თქმით, "რუსი სამხედროები ადგილობრივ მოსახლეობას მიჰყავთ რუსეთის გარეუბანში, შორეულ აღმოსავლეთში ან ციმბირში".

დღეს, 3 მაისს უკრაინის ვიცეპრემიერმა, ირინა ვერეშჩუკმა თქვა, რომ აზოვსტალიდან ზაპოროჟიეში 156 ადამიანის ევაკუაცია განხორციელდა. მისივე თქმით, ქარხანაში კვლავ რჩებიან მოქალაქეები. მარიუპოლის მერმა, ვადიმ ბოიჩენკომ მადლობა გადაუხადა ევაკუაციის პროცესში ჩართულ ყველა წევრს.

სამხედროები დანებებასა და იარაღის დაყრას არ აპირებენ. 20 აპრილს მარიუპოლის მცველებმა მსოფლიოს მოუწოდეს, აზოვსტალიდან გაიყვანონ მესამე ქვეყანაში ყველა, ვინც სამხედრო გარნიზონშია.