უკრაინის შინაგან საქმეთა მინისტრის მრჩევლის, ანტონ გერაშენკოს განცხადებით, სავარაუდოდ, ქართული ოცნების დამფუძნებლის, ბიძინა ივანიშვილის გადაწყვეტილებაა, რომ საქართველოს რუსეთის წინააღმდეგ სანქციებთან შეერთება არ სურს. ამის შესახებ მან ფორმულასთან ინტერვიუში ისაუბრა.

"საქართველოს არ სურს სანქციებს შეუერთდეს რუსეთის წინააღმდეგ, ეს სავარაუდოდ, ბიძინა ივანიშვილის გადაწყვეტილებაა, ვინაიდან ის რუსეთის გავლენების ქვეშაა. ჩვენ არ ვართ კმაყოფილი საქართველოს პოზიციით. ჩვენ გვჭირდება სოლიდარობა. ვიცი, რომ ქართველ ხალხს ძალიან უყვარს უკრაინა, ბევრი ქართველი იბრძვის ჩვენს გამო. ვიცი ბახვა, რომელიც რუსეთის წინააღმდეგ ბრძოლაში დაიღუპა", — აღნიშნა მან [ფორმულას თარგმანი].

გერაშენკომ ისაუბრა ყოფილ პრეზიდენტზე, მიხეილ სააკაშვილზე და თქვა, რომ ის დღეს "პუტინის მტერია", ხოლო ბიძინა ივანიშვილი "რუსეთისგან მართული".

"ახლა, ომის დროს, მე არ მაქვს იმედი, რომ ივანიშვილს მისცემენ უფლებას, რომ სააკაშვილი გადმოგვცენ. სააკაშვილი არის ლიდერი, რომელიც ახლა ზის ციხეში რუსეთის ბრძანებით", — თქვა მან [ფორმულას თარგმანი].