ქართული ოცნების დეპუტატის, გია ვოლსკის განცხადებით, საქართველოში არანაირი მოლაპარაკება სანქციების გვერდის ავლაზე არ მიმდინარეობს. ასე გამოეხმაურა უკრაინის დაზვერვის განცხადებას, რომ რუსეთი სხვა ქვეყნების, მათ შორის საქართველოს, დახმარებით სანქციების თავიდან არიდებას ცდილობს.

"ერთი რამ შემიძლია, ვუთხრა დარწმუნებით უკრაინელ ხალხს, ვინც ამ დეზინფორმაციას უსმენს, საქართველოში არანაირი მოლაპარაკება სანქციების გვერდის ავლაზე არ მიმდინარეობს. ასეთი არ განხორციელდება, ასეთი ვერ განხორციელდება, არც საქონელი და არც ბიზნესი, რომელსაც სანქციები ადევს, საქართველოს გავლით არ მოხვდება არც ერთ ბაზარზე, რომელთა დაშვება არ აქვს საერთაშორისო სანქციებს", — ამბობს ის.

პარლამენტის თავმჯდომარემ კი დაზვერვის ამ ინფორმაციასაც არა არგუმენტული უწოდა და თქვა, რომ მსგავსი განცხადებები არ არგებს იმ მეგობრულ ურთიერთობას, რომელიც უკრაინასა და საქართველოს შორის არის.

"ამ შემთხვევაშიც ვნახეთ, აბსოლუტურად არგუმენტების გარეშე გაკეთებული განცხადება, ისევე როგორც წინა შემთხვევაში ვხედავთ, რომ შემდეგ არანაირი მტკიცებულება ამას არ მოჰყოლია. აქაც ჩანს, რომ არის უბრალოდ განცხადება. სამწუხარო არის ეს ნამდვილად, არ არგებს იმ მეგობრულ ურთიერთობას, რომელიც უკრაინასა და საქართველოს შორის არის. [...] მიუხედავად იმისა, რომ არის სურვილი, რომ სანამ ინფორმაციები გავრცელდება მოხდეს გადამოწმება, როგორც ჩანს, ამ შემთხვევაშიც, არ მოერიდნენ პირდაპირ განცდების გაკეთებას", — თქვა პაპუაშვილმა.

პირველ მაისს უკრაინის დაზვერვამ თქვა, რომ რუსეთი სხვა ქვეყნების დახმარებით სანქციების თავიდან არიდებას ცდილობს. მათი თქმით, რუსეთი აწარმოებს მოლაპარაკებებს საქართველოსთან, სომხეთთან და აზერბაიჯანთან რუსული პროდუქციის საერთაშორისო ბაზრებზე რეექსპორტისთვის.

უწყების თქმით, პროდუქციის მიწოდება იგეგმება ქართული, სომხური და აზერბაიჯანული პროდუქციის გამოყენებით და ასე გატანა მესამე ქვეყნებში. როგორც განცხადებაში ვკითხულობთ,ამ ქვეყნებში უკვე 200-ზე მეტი ასეთი კომპანიაა შექმნილი.