საქართველოს პროკურატურა ირაკლი სესიაშვილის შვილის, დავით სესიაშვილის კავშირს ჩანთის ქურდობასთან უარყოფს და ამასთან დაკავშირებით განცხადებას ავრცელებს. უწყების მტკიცებით, დავით სესიაშვილი იმ მანქანის მფლობელის ნაცნობია, საიდანაც ჩანთა მოიპარეს, აღნიშნული ავტომანქანით ხშირად სარგებლობდა და სწორედ ამიტომ აღმოჩნდა მისი თითის ანაბეჭდები მანქანაზე. პროკურატურის ინფორმაციით, გამოძიებით ასევე დადგენილია, რომ დანაშაული ძველი თბილისის ტერიტორიაზე მოხდა, დავით სესიაშვილი კი ამ დროს ვაკე-საბურთალოს რაიონის ტერიტორიაზე იმყოფებოდა:

"ამდენად საქმეზე შეკრებილი მტკიცებულებების ერთობლიობა გამორიცხავს დანაშაულის ჩადენის დროს დავით სესიაშვილის დანაშაულის ჩადენის ადგილზე ყოფნას და მის რაიმე კავშირს თ. წილოსანის ჩანთის ქურდობის ფაქტთან," - წერია პროკურატურის განცხადებაში.

საქმე ეხება 2015 წლის 5 მარტს, ავტომანქანიდან ხელჩანთის ქურდობის ფაქტს. გამოძიებამ მანქანის გარე ზედაპირიდან ამოიღო თითის კვლები, საიდანაც ორი თითის ანაბეჭდი დავით სესიაშვილის თითის ანაბეჭდების იდენტური აღმოჩნდა.

ერთიანი ნაციონალური მოძრაობის მტკიცებით, მთავარი პროკურორის ჩარევით საქართველოს პარლამენტის დეპუტატის, ირაკლი სესიაშვილის შვილის, დავით სესიაშვილის დანაშაულებრივი საქმე მიიჩქმალა. თავად ირაკლი სესიაშვლი ენმ-ის გავრცელებულ ინფორმაციას სიცრუეს უწოდებს.