დავით ხიდაშელი რაჭაში, 104 712 ჰექტარი ტყის 49-წლიანი იჯარით მიღებას ადასტურებს. ბიზნესმენის განცხადებას ტელეკომპანია იმედი ავრცელებს. ხიდაშელმა სანადირო მეურნეობის შექმნის მიზნით, 1 151 832 ლარად სამონადირეო ლიცენზია მიიღო.

ხიდაშელი წერს, რომ მისი სახელის დისკრედიტაციის მიზნით დეზინფორმაციული კამპანია მიმდინარეობს. მისივე თქმით, სამონადირეო ლიცენზიის მიღებასთან დაკავშირებით საქართველოს მთავრობას 4 წლის განმავლობაში მიმართავდა, რადგან მისი სურვილია, საქართველოში განადგურებულ ცხოველთა გარკვეული ჯიშების აღდგენა და საერთაშორისო სტანდარტების შესაბამისი სანადირო მეურნეობის შექმნა.

"მე ვფლობ რამდენიმე სანადირო მეურნეობას მთელი მსოფლიოს მასშტაბით — აფრიკასა და ევროპაში. დიდი სურვილი მქონდა, რომ საქართველოსაც ჰქონდეს საერთაშორისო სტანდარტის შესაბამისი სანადირო მეურნეობა. 4 წლის განმავლობაში მივმართავდი საქართველოს მთავრობას ამ საკითხთან დაკავშირებით, რადგან საქართველოში არსებობს 20-მდე სანადირო მეურნეობა და არც ერთი არ არის მიმართული მოსახლეობისა და ტურისტების სარგებლობისთვის.

გარდა ამისა, საქართველოში ცხოველთა გარკვეული ჯიშები განადგურებულია და მქონდა სურვილი აღმედგინა. შესაბამისი სპეციალისტებისგან მივიღე რეკომენდაცია, რომ რაჭა იყო ის ტერიტორია, სადაც ცხოველთა ჯიშების ბუნებრივი წესით აღდგენა მოხდებოდა", — წერს ბიზნესმენი.

ხიდაშელის თქმით, აქვს სურვილი სანადირო მეურნეობები არა მხოლოდ რაჭაში, არამედ საქართველოს სხვა რეგიონებშიც განავითაროს, რითაც როგორც ადგილობრივი მოსახლეობა, ისე რამდენიმე მილიონი ტურისტიც ისარგებლებს. ხიდაშელი დაინტერესებულ პირებს ამხანაგობის შექმნას სთავაზობს.

ეროვნული სატყეო სააგენტოს მიერ რაჭა-ლეჩხუმისა და ქვემო სვანეთის რეგიონში, 104 712 ჰექტარ ფართობზე, 49 წლის ვადით სამონადირეო მეურნეობის მოწყობის მიზნით ლიცენზიის გასაცემად აუქციონი 2022 წლის 10 თებერვალს გამოცხადდა. აუქციონში შპს ეიჩ ჯი კაპრა კაუკასიკამ გაიმარჯვა, რომელიც ხიდაშელის კომპანიის მფლობელობაში არსებული ფირმაა. ამის შესახებ ინფორმაცია თავდაპირველად მთის ამბებმა გაავრცელა.

აუქციონის პირობების მიხედვით, მეურნეობის მოწყობისთვის ინვესტორმა სამონადირეო მეურნეობის სპეციალური ლიცენზიის მიღებიდან 5 წლის განმავლობაში, არანაკლებ 5 000 000 ლარის ინვესტიცია უნდა განახორციელოს.

დავით ხიდაშელის კომპანიამ შეიძინა რიყის დოქებიც, რის სანაცვლოდაც 10 020 000 ლარი გადაიხადა და დამატებით 20 მილიონი ლარის ინვესტიციის განხორციელების ვალდებულება აიღო. რიყის დოქების პრივატიზაციის მიზნით, აუქციონი სულ 7-ჯერ გამოცხადა, საიდანაც ექვს შემთხვევაში აუქციონი არ შედგა. თავდაპირველად მთავრობა ამ ობიექტს 95 მილიონ ლარად აფასებდა.

ამასთან, დავით ხიდაშელი ბოლო წლებში ერთ-ერთი ყველაზე გახმაურებული ამბის, ე.წ. კარტოგრაფების საქმის მთავარი მოწმეა. სწორედ ხიდაშელმა ჩამოიტანა რუსეთიდან რუკები, რომელთა საფუძველზეც ივერი მელაშვილისა და ნატალია ილიჩოვას წინააღმდეგ პროკურატურამ საქმე აღძრა. რუსთავი 2-თვის მიცემულ ინტერვიუში ხიდაშელი იხსენებს, თუ როგორ სთხოვა დახმარება ამ საქმესთან დაკავშირებით ბიძინა ივანიშვილმა.

დავით ხიდაშელი დღეს გავრცლებულ განცხადებაში იმასაც ადასტურებს, რომ სანქცირებული რუსი ოლიგაქრის, ვლადიმერ ევტუშენკოვის კომპანიის ვიცე-პრეზიდენტს, ალი უზდენოვს ხორბლის შემოტანის საკითხზე შეხვდა და ამტკიცებს, რომ მას პოლიტიკასთან კავშირი არ აქვს.

დავით ხიდაშელი ვლადიმერ ევტუშენკოვის კომპანიაში, Sistema-ში 2014 წლამდე მაღალ თანამდებობაზე მუშაობდა. რუსთავი 2-თვის მიცემულ ინტერვიუში ხიდაშელი ამბობდა, რომ Sistema მას შემდეგ დატოვა, რაც ამ კომპანიას რუსეთის ხელისუფლებამ პრობლემები შეუქმნა.

ხიდაშელის განცხადებით, ჰქონდა კომუნიკაცია ღარიბაშვილთანაც, თუმცა მან ის ბიზნესსექტორთან გადაამისამართა და დასძენს, რომ ბიზნეს სექტორთან შეხვედრები რამე კონკრეტული შედეგებით არ დასრულებულა.

სავარაუდოდ, ვლადიმირ ევტუშენკოვისა და ბიძინა ივანიშვილის საუბარი ინტერნეტში გუშინ, 25 აპრილს გავრცელდა. ჩანაწერში საუბარია ბიზნესგეგმებზე, რამაც გააჩინა მოსაზრება, რომ ოლიგარქები სანქციებისთვის გვერდის ავლას ცდილობენ.