რუსეთის თავდაცვის სამინისტრო აცხადებს, რომ "ნა ხ*ი" გაშვებული სამხედრო გემის, მოსკოვის ეკიპაჟის ერთი წევრი დაიღუპა. მათივე მტკიცებით, დაკარგულად ითვლება — 27.

როგორც Reuters წერს, სამინისტრო ამტკიცებს, რომ დანარჩენი 396 წევრის ევაკუაცია მოახერხებს. რუსეთმა მხოლოდ 15 აპრილს აღიარა, რომ გემი ჩაიძირა, თუმცა თავდაცვის უწყებამ მიზეზად ბუქსირებისას საბრძოლო მასალის აფეთქების შედეგად მიღებული დაზიანება დაასახელა.

კრეისერის დაბომბვაზე ინფორმაცია 13 აპრილს გავრცელდა. უკრაინული მედია წერდა, რომ იწვოდა რუსული სამხედრო გემი სახელად "მოსკოვი" — სწორედ ის, რომელსაც კუნძულ ზმეინის მცველებმა მიმართულება ომის დაწყებისთანავე მიუთითეს.

15 აპრილს კი უკრაინის პრეზიდენტის ადმინისტრაციის მრჩევლმა, ალექსეი არესტოვიჩმა განაცხადა, რომ "მოსკოვი", რომელიც კუნძულ ზმეინის მცველებმა "ნა ხ*ი" გაუშვეს, იძირება. თუმცა, რუსეთი ამას არ აღიარებდა. თავდაცვის სამინისტრო ამტკიცებდა, რომ გაჩენილი ხანძარი ლოკალიზებული იყო და მუშაობდნენ იმაზე, რომ გემი პორტში ბუქსირით შეეყვანათ.

მოგვიანებით, პენტაგონის პრესმდივანმა, ჯონ კირბიმ CNN-ს განუცხადა, რომ "მოსკოვზე" სერიოზული აფეთქება მოხდა, თუმცა ის სვლას აგრძელებდა. მისივე თქმით, გემი, სავარაუდოდ, სევასტოპოლში შესაკეთებლად გაჩერდებოდა.

რუსული სამხედრო გემის ჩაძირვა კოლოსალური სამხედრო მოვლენაა და მნიშვნელოვნად ამცირებს შავ ზღვაში რუსეთის სამხედრო პოტენციალს. გარდა ამისა, არესტოვიჩი ამბობს, რომ რუსეთისთვის ეს ძლიერი გარტყმაა სახეში და ხომალდის სახელიც სიმბოლურია. როგორც BBC-ის რუსული ბიურო განმარტავს, "მოსკოვი" შავი ზღვის ფლოტის ფლაგმანი იყო და რუსულ ფლოტში ყველაზე ძლიერ შეიარაღებად ითვლებოდა.