ქართველი ავტომოყვარულების მცირე ნაწილს ახალი Range Rover-ის ხილვის საშუალება მიეცა. ეს განსაკუთრებული ამბავია, რადგან სხვა ფერებთან ერთად, ჯი-თი მოტორსის შოურუმში Range Rover Batumi Gold იდგა — ავტომობილი, რომელსაც ქართველი აუდიტორია მოუთმენლად ელოდა.

ლეგენდარული მოდელები დახურულ ჩვენებაზე წარადგინეს. არსებული ვითარებიდან გამომდინარე, ჯი-თი მოტორსმა გადაწყვიტა, გრანდიოზული ღონისძიება არ გაემართა. ამიტომ დახურულ ჩვენებას მხოლოდ კომპანიის VIP მომხმარებლები და Range Rover-ის მფლობელები ესწრებოდნენ. თუმცა, Range Rover Batumi Gold მათთვისაც განსაკუთრებული ინტერესის ობიექტი იყო.

"გვიხარია, რომ რეგიონში ერთ-ერთი პირველები ვართ, ვინც ახალი Range Rover წარადგინა. ცხადია, შოურუმში ამ მოდელის სხვადასხვა ფერს შეხვდებით, თუმცა, გასაკვირი არცაა, რომ განსაკუთრებული ყურადღების ცენტრში Range Rover Batumi Gold მოექცა. მასზე იმდენად დიდი მოთხოვნაა, რომ წინასწარი შეკვეთები ჯერ კიდევ ოქტომბერში, წარდგენის დღეს მივიღეთ.ის, რომ მსოფლიო ბრენდმა ავტომობილის ექსტერიერის ერთ-ერთ ფერს ჩვენი ზღვისპირა ქალაქის სახელი დაარქვა, ჩვენი ქვეყნისთვის ნამდვილად მნიშვნელოვანი და საამაყოა. მიხარია, რომ ამის ერთ-ერთ მიზეზად Jaguar Land Rover-თან წარმატებული თანამშრომლობაც სახელდება", — აცხადებს ჯი-თი მოტორსის გენერალური დირექტორი, თემურ უსტიაშვილი.

მოდერნიზებული Range Rover-ისთვის ბრიტანული ავტოგიგანტის დიზაინერებმა განსხვავებული ფერები შექმნეს. Batumi Gold-ის შემთხვევაში, ინსპირაცია ბათუმის შთამბეჭდავი ხედები და მზის ჩასვლა იყო. მსოფლიო ყველაზე მოთხოვნადი ავტომობილის ახალ ვერსიას რამდენიმე წელი ელოდა. ის, რომ ასეთი მოვლენა, გარკვეულწილად, საქართველოს ზღვისპირა ქალაქთან ასოცირდება, ქვეყნისთვის საკმაოდ მნიშვნელოვანია. ამით ბათუმი მსოფლიო რუკაზე კიდევ ერთხელ მოინიშნა.

თუმცა, Jaguar Land Rover-ისთვის ბათუმი სილამაზე გადამწყვეტი ფაქტორი არ ყოფილა. ასეთი ჟესტით მსოფლიო ბრენდმა რეგიონული ოფისის პატივისცემა გამოამჟღავნა. Jaguar Land Rover-ისა და ჯი-თი მოტორსის თანამშრომლობა 14 წელს ითვლის. კომპანია ბოლო სამი წლის განმავლობაში რეგიონში წამყვან პოზიციას იკავებს და ტოპ ხუთ ქვეყანაში შედის. აღსანიშნავია წარმატება მომხმარებელთა მომსახურების კუთხითაც. ამ მიმართულებით Jaguar Land Rover-ის საქართველოს ოფისი რეგიონის პირველ სამეულში მოხვდა.

"Jaguar Land Rover-ისა და ჯი-თი მოტორსის თანამშრომლობა 14 წლის წინ დაიწყო. ეს საქმიანი ურთიერთობა წლიდან წლამდე კიდევ უფრო ძლიერდება. ჯი-თი მოტორსს შესანიშნავი გუნდი ჰყავს და ეს ძალიან კარგად ეტყობა დღევანდელ ღონისძიებასაც. მათ საკუთარ მომხმარებლებთან ნამდვილად განსაკუთრებული ურთიერთობა აქვთ. სწორედ ქართველ მომხმარებელს, რეგიონში ერთ-ერთ პირველს წარვუდგინეთ ახალი Range Rover. ღიმილი სტუმრების სახეებზე ძალიან სასიამოვნო სანახავია. ვხვდები, რომ ეს ავტომობილი ქართველ მომხმარებლებში მარლაც განსაკუთრებულ ემოციებს იწვევს", — აღნიშნავს Jaguar Land Rover-ის რეგიონული ოფისის გაყიდვების დირექტორი, რობ პრესტონი.

ჯი-თი მოტორსში ამბობენ, რომ Range Rover-ის ყველა მოდელი, რომელიც საქართველოში ჩამოიყვანეს, უკვე გაყიდულია. რადგან მასზე საკმაოდ დიდი მოთხოვნაა. ამავე მიზეზით, ამ ეტაპზე ჯი-თი მოტორსში შეკვეთების მიღებაც შეზღუდულად მიმდინარეობს.

დიზაინერებმა Range Rover-ის განახლებული მოდელის ძირითადი კლასიკური მახასიათებლები შეინარჩუნეს. ამიტომ, ერთი შეხედვით არის შესაძლებელი იმის მიხვედრა, რომ ნამდვილად Range Rover-ს ვუყურებთ. დიზაინი მოდერნიზებულია, სტილი კი მეტად დახვეწილი და მინიმალისტური. შეიძლება ითქვას, რომ Range Rover-ის არსებობის ისტორიის მანძილზე, განახლებული მოდელი ყველაზე კომფორტული და მდიდრული SUV-ია. ავტომობილი აღჭურვილია უახლესი ტექნოლოგიებით და ოპერაციული სისტემა ფაქტობრივად იმავე ფუნქციებს ასრულებს, რასაც ნებისმიერი კარგი სმარტფონი. აღსანიშნავია, რომ სპეციალურად ამ მოდელის ტექნიკური აღჭურვისთვის 125 ახალი პატენტი შეიქმნა. მაგალითად, Range Rover-ში დაგხვდებათ სმარტფონის Wireless დამტენი, რომელშიც სიგნალის გამაძლიერებელია დამონტაჟებული. ჰაერის წმენდისა და ხმის იდეალური იზოლაციის უნიკალური სისტემები კი ახალ Range Rover-ს კიდევ უფრო სასურველს ხდის.