ქვემო ქართლში მოტაცებულ 17 წლის გოგოს ამ დრომდე ეძებენ. საქმეს აკვირდება სახალხო დამცველის აპარატიც.

შემთხვევა გუშინ, 28 აპრილს დილით მოხდა. სკოლაში მიმავალი არასრულწლოვანი გოგო ცოლად მოყვანის მიზნით მოიტაცეს.

აღნიშნულ ფაქტს ფეისბუკზე გამოეხმაურა ქალთა უფლებადამცველი ბაია პატარაია. პატარაია პოლიციას გულგრილობაში ადანაშაულებს, იმის გამო, რომ მოტაცებული გოგო ეთნიკურად აზერბაიჯანელია.

"ამ ქვეყანაში ქალი ნივთია, რომელზეც მორიგდები და ვის გამოც ციხეში არავინ უნდა წავიდეს. და პოლიცია რას აკეთებს? არაფერს! ბიჭის მთელმა სანათესაომ იცის სად მალავენ გოგოს და პოლიციამ არ იცის," - წერს პატარაია.

გამოძიება სისხლის სამართლის კოდექსის 143-ე მუხლით მიმდინარეობს, რაც თავისუფლების უკანონო აღკვეთას გულისხმობს და ისჯება პატიმრობით ორიდან ოთხ წლამდე.