"მოსკოვის" ჩაძირვის შემდეგ რუსეთი ნეპტუნის ტიპის გემსაწინააღდეგო რაკეტების მწარმოებელ ქარხანას, ვიზარს დაესხა თავს.

როგორც Unian წერს, რუსეთმა სარაკეტო იერიში 15 აპრილს, 1:30 საათზე მიიტანა, მას შემდეგ, რაც რუსული ხომალდის ჩაძირვაზე ინფორმაცია მიიღეს.

გუშინ, 14 აპრილს კი უკრაინის პრეზიდენტის ადმინისტრაციის მრჩევლმა, ალექსეი არესტოვიჩმა განაცხადა, რომ "მოსკოვი", რომელიც კუნძულ ზმეინის მცველებმა "ნა ხ*ი" გაუშვეს, იძირება. თუმცა, რუსეთი ამას არ აღიარებდა. თავდაცვის სამინისტრო ამტკიცებდა, რომ გაჩენილი ხანძარი ლოკალიზებული იყო და მუშაობდნენ იმაზე, რომ გემი პორტში ბუქსირით შეეყვანათ.

მოგვიანებით, პენტაგონის პრესმდივანმა, ჯონ კირბიმ CNN-ს განუცხადა, რომ "მოსკოვზე" სერიოზული აფეთქება მოხდა, თუმცა ის სვლას აგრძელებდა. მისივე თქმით, გემი, სავარაუდოდ, სევასტოპოლში შესაკეთებლად გაჩერდებოდა.

რუსული სამხედრო გემის ჩაძირვა კოლოსალური სამხედრო მოვლენაა და მნიშვნელოვნად ამცირებს შავ ზღვაში რუსეთის სამხედრო პოტენციალს. გარდა ამისა, არესტოვიჩი ამბობს, რომ რუსეთისთვის ეს ძლიერი გარტყმაა სახეში და ხომალდის სახელიც სიმბოლურია. როგორც BBC-ის რუსული ბიურო განმარტავს, "მოსკოვი" შავი ზღვის ფლოტის ფლაგმანი იყო და რუსულ ფლოტში ყველაზე ძლიერ შეიარაღებად ითვლებოდა.

პენტაგონის მაღალჩინოსანი აცხადებს, რომ "მოსკოვის" ჩაძირვა უკრაინული სარაკეტო დარტყმების შედეგი იყო. მისი თქმით, ხომალდს ჩაძირვამდე ორი ნეპტუნის ტიპი რაკეტა მოხვდა.