ევროკავშირის ოფიციალური პირები რუსულ ნავთობზე ეტაპობრივი ემბარგოს პროექტს ამზადებენ. ამის შესახებ The New York Times წერს. გამოცემის ცნობით, ემბარგო საფრანგეთში 24 აპრილს ჩანიშნულ საპრეზიდენტო არჩევნების მეორე ტურამდე არ განხორციელდება.

გამოცემა წერს, რომ მსგავსად რუსულ ქვანახსირზე დაწესებული სანქციებისა, ნავთობზე ემბარგო გარკვეული პერიოდის შემდეგ დაწესდება, რაც იმპორტიორ ქვეყნებს ახალი მომწოდებლების ძიებისთვის დროს მისცემს. ასეთ ქვეყნებს შორის უმთავრესად გერმანია სახელდება.

რუსულ ნავთობზე ემბარგო უკვე დააწესა ამერიკის შეერთებულმა შტატებმა. ამასთან, დიდი ბრიტანეთის პრემიერმინისტრის განცხადებით, ქვეყანა რუსულ ნავთობზე დამოკიდებულებას წლის ბოლომდე ჩამოშორდება.

როგორც ცნობილია, ენერგორესურსების ექსპორტი რუსეთის შემოსავლის მნიშვნელოვან ნაწილს წარმოადგენს. 2011-2020 წლებში რუსეთის მთავრობის წლიური შემოსავლების დაახლოებით 43% სწორედ ნავთობსა და ბუნებრივ გაზზე მოდიოდა.

ცენტრალური ბანკის აქტივების გაყინვის ფონზე რუსეთისთვის ექსპორტიდან მიღებული შემოსავლები სასიცოცხლოდ მნიშვნელოვანია. 4 აპრილს რუსეთმა სცადა, დოლარში დენომინირებული ორი ევრობონდი რუბლებში გადაეხადა, რაც გავლენიანმა სარეიტინგო სააგენტომ, S&P-მა დეფოლტად შეაფასა.