რუსეთის მუქარის პასუხად უკრაინის პრეზიდენტმა განაცხადა, რომ მათი არ ეშინიათ, მაგრამ სერიოზულად უდგებიან, რადგან ამაზე ადამიანების სიცოხლეა დამოკიდებული. გუშინ რუსეთში თქვეს, რომ თუ "დივერსიები გაგრძელდება" გადაწყვეტილების მიმღებ ცენტრებს დაარტყამენ.

"ჩვენ ყველა მუქარას სერიოზულად ვუყურებთ, რადგან ეს მუქარა დაკავშირებულია იმასთან, რომ ჩვენი ხალხი შეიძლება დაიღუპოს. ჩვენ არ გვეშინია რუსეთის ფედერაციის არც ერთი საფრთხის, ამავე დროს ჩვენ უნდა ვუპასუხოთ რუსეთის ფედერაციის ყველა ნაბიჯს, რომელიც გვემუქრება", — განუცხადა ზელენსკიმ BBC-ის.

ზელენსკიმ ასევე გაიხსენა აფეთქებები ოკუპირებულ დონეცკში, რომელიც რუსეთმა მოაწყო და უკრაინა დაადანაშაულა.

"როგორც ახლა, ჩვენ არ გვაქვს წვდომა სამხრეთ უკრაინის ზოგიერთ ჩვენს ქალაქში: მელიტოპოლი, ბერდიანსკი, მარიუპოლი, მთელი ბლოკი ზაპოროჟიეს მიმართულებით, ანუ იქ ოკუპირებული ქალაქებია. არის აფეთქებები. ადამიანებს, რომლებიც იქ არიან, ჩვენ უკრაინელებს ეუბნებიან, რადგან ტელევიზია გამორთულია, მობილური კომუნიკაცია არ არის, ეუბნებიან, რომ ჩვენ ვბომბავთ მარიუპოლს", – განაცხადა მან და დაამატა, რომ ხალხი ვერ ხედავს რეალურ მდგომარეობას და ეს პრობლემაა.

14 აპრილს რუსეთის თავდაცვის სამინისტრო კიევს დაემუქრა. მათი განცხადებით, ხედავენ უკრაინული ჯარების მიერ დივერსიისა და რუსეთის ტერიტორიაზე არსებულ ობიექტებზე დარტყმის მცდელობებს, რასაც უპასუხებენ.

13 აპრილს უკრაინის პრეზიდენტის ადმინისტრაციის მრჩეველმა, ალექსეი არესტოვიჩმა იხუმრა, რომ დაბომბილი რუსული სამხედრო ხომალდი, სავარაუდოდ, არასწორ ადგილას მოწეული სიგარეტის ან უსაფრთხოების წესების დარღვევის გამო იწვის და ისევე არ გაუმართლა, როგორც ბელგოროდს. ამით მან მიანიშნა რუსეთში, ბელგოროდის ნავთობის ბაზაზე გაჩენილ ხანძარზე, რომლის მიზეზადაც რუსეთის ხელისუფლებამ უკრაინული თვითმფრინავების თავდასხმა დაასახელა. უკრაინას ეს ამ დრომდე არ დაუდასტურებია.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში.