ოლენა ზელენსკას თქმით, უკვე ერთ თვეზე მეტია, რაც უკრაინის პრეზიდენტი არ უნახავს, რადგან ქვეყანაში რუსეთის შეჭრის შედეგად დაწყებული ომი ისევ გრძელდება.

"ვოლოდიმირი და მისი გუნდი რეალურად საპრეზიდენტო ოფისში ცხოვრობენ. მოსალოდნელი საფრთხის გამო, მე და ჩემს შვილებს იქ დარჩენა გვეკრძალება. ასე რომ, ერთ თვეზე მეტია, ჩემს ქმარს მხოლოდ ტელეფონით ვეკონტაქტები", — განაცხადა ოლენა ზელენსკამ CNN-თან ინტერვიუში.

შეგახსენებთ, რომ 24 თებერვალს, როცა რუსეთი უკრაინაში შეიჭრა, ოლენა ზელენსკამ და ვოლოდიმირ ზელენსკიმ ქვეყნის დატოვებაზე უარი განაცხადეს. ამ დღიდან მოყოლებული გარკვეული პერიოდის განმავლობაში ვოლოდიმირ ზელენსკისა და მის თანაგუნდელებს კიევის სამთავრობო ოლქში ეძინათ და როგორც უკრაინის პრეზიდენტმა ერთ-ერთ ინტერვიუში აღნიშნა, თავადაც არ იცის, როდის შეძლებს ცოლისა და ოჯახის ნახვას.

ვოლოდიმირ ზელენსკიმ CBS-სთან ინტერვიუში განაცხადა, რომ გუნდთან ერთად ხშირად ბნელ ოთახებში უწევს მუშაობა, რათა რუსული ჯარების სამიზნე არ გახდეს. ინტერვიუს ვიდეოჩანაწერში კი ჩანს, რომ უკრაინის პრეზიდენტი თანამშრომლებთან ერთად ჩაბნელებულ დერეფნებში ცხოვრობს და მათ იატაკზე დაფენილ ლეიბებზე სძინავთ.