ქართული ოცნების თავმჯდომარე, ირაკლი კობახიძე აცხადებს, რომ უკრაინის რადას თავმჯდომარის, რუსლან სტეფანჩუკის ინტერვიუ "ოპტიმიზმის საფუძველს აძლევთ", რომ უკრაინაში "მეგობრული საუბარი" ექნებათ, რაც სხვადასხვა საკითხის გადაჭრისთვის დასაწყისი იქნება.

"ჩვენ გუშინ მოვისმინეთ ინტერვიუ და ეს ინტერვიუ გვაძლევს ჩვენ ოპტიმიზმის საფუძველს სხვადასხვა მიმართულებით, რა თქმა უნდა, მტკიცებით ფორმატში იმის თქმა, რომ ყველა საკითხი ერთბაშად მოგვარდება, შეუძლებელია, თუმცა გვაქვს ოპტიმიზმის საფუძველი, რომ გვექნება მეგობრული საუბარი, პარლამენტის თავმჯდომარეს ექნება თავის კოლეგასთან მეგობრული საუბარი უკრაინაში და ეს გახდება დასაწყისი ყველა საკითხის გადაჭრისთვის. ეს არის ჩვენი ოპტიმისტური მოლოდინი", — აღნიშნა მან.

რაც შეეხება შალვა პაპუაშვილის უკრაინაში გამგზავრებას, როგორც კობახიძე აცხადებს, საბოლოო ჯამში წასვლასთან დაკავშირებით პაპუაშვილის ინიციატივა გაიზიარეს. ასევე, "ყურადღებით" აკვირდებოდნენ რადას თავმჯდომარესთან ინტერვიუს.

"ჩვენ ასევე ყურადღებით ვადევნებდით თვალს ინტერვიუს, რომელიც შედგა უკრაინის პარლამენტის თავმდჯომარესთან, სადაც მოვისმინეთ ძალიან საინტერესო და ოპტიმიზმით გაჯერებული გზავნილები ორმხრივ ურთიერთობებთან დაკავშირებით, ეს ყველაფერი გახდა, რა თქმა უნდა, ჩვენი გადაწყვეტილების საფუძველი.

ჩვენთვის მნიშვნელოვანია სოლიდარობის გამოხატვა უმაღლეს დონეზე უკრაინის მიმართ, როგორც ხალხის მიმართ, ასევე, სახელმწიფოს მიმართ და ამ კუთხით შალვა პაპუაშვილის ვიზიტი არის ძალიან მნიშვნელოვანი და ასევე, ორმხრივ ურთიერთობებზე იქნება, ბუნებრივია, საუბარი ამ ვიზიტის ფარგლებში", — თქვა კობახიძემ.

8 აპრილს საქართველოში უკრაინის საქმეთა დროებითმა რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევდა, რათა საკუთარი თვალით ნახონ იქ ჩადენილი დანაშაულები. პაპუაშვილის განცხადებით, რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანს". პარლამენტის თავმჯდომარემ თქვა ისიც, რომ უკრაინის და უკრაინელი ხალხის მხარდაჭერა ადამიანური და ისტორიული ვალია.

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა უკრაინის რადას თავმჯდომარემ კოლეგას.

გუშინ კი სტეფანჩუკმა განაცხადა, რომ 13 აპრილს პაპუაშვილთან ოფიციალური ზარი ექნება და კიდევ ერთხელ დაუდასტურებს მოწვევას. დღეს პაპუაშვილმა დაწერა, რომ უკრაინაში მისი ვიზიტი მნიშვნელოვან როლს შეასრულებს. როდის ჩავა ის უკრაინაში არ დაუკონკრეტებია. ამასთან, როგორც გუშინ, 12 აპრილს გახდა ცნობილი, საპარლამენტო დელეგაცია უკრაინაში ჩასვლას კვირის ბოლომდე გეგმავს. დელეგაციის წევრებს შორის, სავარაუდოდ, იქნებიან დავით სერგეენკო, ბექა ოდიშარია და არჩილ თალაკვაძე.