საფრანგეთის პრეზიდენტი, ემანუელ მაკრონი აცხადებს, რომ რუსეთის ქმედებებისთვის გენოციდის წოდებისგან თავს შეკავებს, რადგან რუსები და უკრაინელები "ძმები არიან". ამის შესახებ მან France 2-თან ისაუბრა.

"დღეს ასეთ ტერმინებთან ფრთხილად ვიქნები, რადგან ეს ორი ხალხი [რუსები და უკრაინელები] ძმები არიან. მინდა გავაგრძელო ცდა, რამდენადაც შემიძლია, რომ შევაჩერო ეს ომი და აღვადგინო მშვიდობა. დარწმუნებული არ ვარ, რომ რიტორიკის ესკალაცია ამას ემსახურება", — ამბობს ის.

მაკრონის თქმით, სიტუაცია მიუღებელია და ის რაც უკრაინაში ხდება ომის დანაშაულია და უპრეცედენტოა ევროპულ მიწაზე. საფრანგეთის პრეზიდენტმა, რომელიც ამჟამად არჩევნებში გამარჯვებისთვის იბრძვის, ასევე აღნიშნა, რომ საფრანგეთი თანამშრომლობს უკრაინასთან სავარაუდო სამხედრო დანაშაულების გამოსაძიებლად.

გუშინ, 12 აპრილს ამერიკის შეერთებული შტატების პრეზიდენტმა, ჯო ბაიდენმა მოსახლეობასთან გაზის გაზრდილ ტარიფებზე საუბრისას განაცხადა, რომ რუსეთმა უკრაინაში გენოციდი მოაწყო. ამას უკრაინის პრეზიდენტმა, ვოლოდიმირ ზელენსკიმ ნამდვილი ლიდერის ჭეშმარიტი სიტყვები უწოდა.