მესამე სეზონის გამოსვლიდან თითქმის სამი წლის შემდეგ ნეტფლიქსმა თავისი გახმაურებული სერიალის უცნაური ამბები მეოთხე სეზონის სრული ტრეილერი გამოაქვეყნა.

ახალი სეზონის პრემიერა სულ ახლოსაა და ერთგული მაყურებლების ლოდინიც დასასრულს უახლოვდება, ოღონდ ამჯერად ერთის ნაცვლად ორი პრემიერა გვექნება: სეზონის პირველი ნაწილი 27 მაისს გამოვა, მეორე ნაწილი კი პირველ ივლისს. ჯამში სულ 9 სერია იქნება.

იქამდე კი ამ ტრეილერით შეგიძლიათ შეიქმნათ წარმოდგენა, თუ როგორი სანახაობა გველოდება წინ:

რომ აღარაფერი ვთქვათ იმაზე, თუ როგორ შეიცვალნენ ჩვენი საყვარელი გმირების როლის შემსრულებლები და ბავშვებიდან თინეიჯერებად იქცნენ, ტრეილერით თუ ვიმსჯელებთ, შოუ უფრო შავბნელი გახდა: ატმოსფერო 80-იანების საშინელებათა ჟანრის ფილმებს მოგვაგონებს.

ამავე ტრეილერით ვიგებთ, რომ ისტორიის მთავარ გმირებს ახალი და შესაძლოა, კიდევ უფრო მასშტაბური და რთული გამოწვევები აქვთ დასაძლევი — ისინი პარალელურ სამყაროში შემზარავ ურჩხულს უნდა დაუპირისპირდნენ.

გავრცელებული ინფორმაციით, უცნაური ამბები მეხუთე სეზონით დასრულდება, იქამდე კი ისღა დაგვრჩენია, ჯერ მეოთხე სეზონის პრემიერას დაველოდოთ.