ტელეკომპანია ფორმულას ერთ-ერთი დამფუძნებელი და ტელეწამყვანი მიშა მშვილდაძე ფეისბუქპოსტის გამო სახელმწიფო უსაფრთხოების სამსახურში გამოკითხვაზე დაიბარეს. როგორც სუს-ში On.ge-ს განუცხადეს, ის მაგისტრი მოსამართლის თანხლებით დღეს, 17 საათზე დაიკითხება.

მშვილდაძემ სტატუსი 4 აპრილს დაწერა. ამით ის პრემიერმინისტრის განცხადებას გამოეხმაურა, რომელშიც ღარიბაშვილი უკრაინის "დასჯასა და დაჩაგვრაზე" საუბრობდა.

"ასეთი აზრი მაქვს დიდი ხანია, ორი დიდი აქციით საკითხის გადაწყვეტის ამბავი: იკრიბება დიდი აქცია შაბათს და ამბობს, რომ ხვალ დილამდე ღარიბაშვილი უნდა იყოს გადამდგარი, თორემ ხვალ ზუსტად ეს იგივე ხალხი შევიკრიბებით და დავლეწავთ კანცელარიას. გადადგება? — თეკლეს და არ გადადგება და უნდა შევიკრიბოთ და დავლეწოთ. სულ ესაა", — დაწერა მშვილდაძემ.

სუს-ში On.ge-ს უთხრეს ისიც, რომ მშვილდაძე უკვე მიმდინარე გამოძიების ფარგლებში დაიკითხება. კერძოდ, საქმე 2020 წლის პირველ ოქტომბერს სისხლის სამართლის კოდექსის 315-ე მუხლის პირველი ნაწილით დაწყებულ გამოძიებას ეხება. უწყებაში მაშინ განმარტავდნენ, რომ გამოძიების დაწყების საფუძველი სახელმწიფო უსაფრთხოების დეპარტამენტში არსებული ოპერატიული ინფორმაცია გახდა, რომლის მიხედვით, კონკრეტული პირები, საპარლამენტო არჩევნებში მათთვის არასასურველი შედეგის შემთხვევაში, გეგმავდნენ მოეხდინათ ხელისუფლების ძალადობრივი გზით დამხობა, რა მიზნითაც ყოფილი სამართალდამცავი და სამხედრო მოსამსახურეების რიგებიდან მობილურ ჯგუფებს აკომპლექტებდნენ.

ამასთან, 2021 წლის 3 ნოემბერს სახელმწიფო უსაფრთხოების სამსახურმა განცხადება გაავრცელა, რომლითაც სოციალურ ქსელებში "რევოლუციურ მოწოდებებს" გამოეხმაურა და მოქალაქეები სასჯელზე გააფრთხილა. ამას წინ უძღოდა სუს-ის გაფრთხილება, რომ საქართველოს კონსტიტუციური წყობილების ძალადობით შეცვლისკენ, სახელმწიფო ხელისუფლების დამხობისკენ, მსგავსი მოწოდების შემცველი მასალის გავრცელება, ამავე მიზნით შეიარაღებული მოწოდება სისხლის სამართლის დანაშაულია თავისუფლების აღკვეთით ისჯება. უწყების ამ განცხადებას მოქალაქეების პროტესტი მოჰყვა და ისინი ფეისბუქზე რევოლუციას პოსტავდნენ.

სუს ამტკიცებდა, სოციალურ ქსელებსა და მასობრივი ინფორმაციის საშუალებებში მოქალაქეები განზრახ თუ გაუცნობიერებლად პირდაპირ მოუწოდებენ თანამოაზრეებს "რევოლუციისა და ხელისუფლების დამხობისკენ, მათ შორის ძალადობრივი გზებით". ამის ფონზე უწყება აცხადებდა, რომ სახელმწიფო ხელისუფლების დამხობისკენ, მსგავსი მოწოდების შემცველი მასალის გავრცელება, ამავე მიზნით შეიარაღებული მოწოდება სისხლის სამართლის დანაშაულია და ისჯება თავისუფლების აღკვეთით 3 წლამდე.