პარლამენტის პირველი ვიცე-სპიკერი, გია ვოლსკი უკრაინის რადას თავმჯდომარის, რუსლან სტეფანჩუკის განცხადებებს ზღვარგადაცილებულს უწოდებს და დასძენს, რომ ეს უნდა შეიცვალოს.

"არ არის ვიზიტი თვითმიზანი, ეს ერთი საკითხი და მეორე, ესეთი ყოველგვარი ზღვარგადაცილებული განცხადებები, რომელიც ახასიათებს პარლამენტის თავმჯდომარეს [...] რადას ხელმძღვანელი მყავს მხედველობაში, რასაკვირველია, გარკვეულწილად უნდა იყოს შეცვლილი", — ამბობს ის.

მისივე თქმით, უკრაინის მხარის განცხადებები პოლიტიკური დემარშია არა მარტო ოფიციალური პირების, არამედ ქართული საზოგადოების მიმართაც, რომელიც "ლუკმას უყოფს თავის მოძმე უკრაინელ ხალხს".

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა უკრაინის რადას თავმჯდომარე კოლეგას საქართველოდან, რომელმაც ბუჩაში ჩასვლაზე უარი თქვა.

8 აპრილს საქართველოში უკრაინის საქმეთა დროებითი რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევს, რათა საკუთარი თვალით ნახონ იქ ჩადენილი დანაშაულები. პაპუაშვილის განცხადებით, რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანს". პარლამენტის თავმჯდომარემ თქვა ისიც, რომ უკრაინის და უკრაინელი ხალხის მხარდაჭერა ადამიანური და ისტორიული ვალია. პაპუაშვილი ამტკიცებს, რომ ამ ვალს ყველა შემთხვევაში შეასრულებენ, "რაც უნდა უსამართლო და უსაფუძვლო ბრალდებები" ესმოდეთ პასუხად.

ამავე თემაზე: