ქართული ოცნების დეპუტატი, გურამ მაჭარაშვილი უკრაინაზე საუბრისას ამბობს, რომ მეგობრული ურთიერთობები ორმხრივი უნდა იყოს. ის, ასევე, აღნიშნავს, რომ საქართველოს უკრაინის მხარდაჭერისას "ულტიმატუმები არ წამოუყენებია".

"ჩვენ საერთაშორისო პლატფორმაზე არ გვითქვამს, რომ მხარს დავუჭერთ უკრაინას იქ პოლიტიკურ მხარდაჭერას, ან ჰუმანიტრარულ მხარდაჭერას გავაგზავნით, თუ უკრაინა ამას და ამას გააკეთებს, ანუ, ულტიმატუმები ჩვენ არ წამოგვიყენებია.

[...] მეგობრული ურთიერთობები დგება ორმხრივად, ცალმხრივ ურთიერთობებზე არც რუსთაველს დაუწერია ვეფხისტყაოსანში და არც არავის", — აბობს ის.

უკრაინის რადას თავმჯდომარემ საქართველოდან კოლეგის ბუჩაში ჩასვლაზე უარს წერილით უპასუხა, რომლის დასასრულსაც მეგობრობის მნიშვნელობაზე ისაუბრა და აღნიშნა, რომ სწორედ ამაზე წერდა შოთა რუსთაველი. მან მაგალითად მოიყვანა შემდეგი ციტატა: "ერთგული მეგობარი მეგობარს დაეხმარება, მას არ ეშინია უბედურების. გულს მისცემს გულს, სიყვარულს კი — ვარსკვლავი გზაში". სადაც ის ვეფხისტყაოსნის შემდეგ მონაკვეთს გულისხმობს: "ხამს მოყვარე მოყვრისათვის თავი ჭირსა არ დამრიდად, გული მისცეს გულისათვის, სიყვარული — გზად და ხიდად".

8 აპრილს საქართველოში უკრაინის საქმეთა დროებითი რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევს, რათა საკუთარი თვალით ნახონ იქ ჩადენილი დანაშაულები. პაპუაშვილის განცხადებით, რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანს". პარლამენტის თავმჯდომარემ თქვა ისიც, რომ უკრაინის და უკრაინელი ხალხის მხარდაჭერა ადამიანური და ისტორიული ვალია. პაპუაშვილი ამტკიცებს, რომ ამ ვალს ყველა შემთხვევაში შეასრულებენ, "რაც უნდა უსამართლო და უსაფუძვლო ბრალდებები" ესმოდეთ პასუხად.

ამავე თემაზე: