პენტაგონის სპიკერი ჯონ კირბი რუსეთის მიერ უკრაინაში მიმდინარე საბრძოლო "ოპერაციაში" ახალი გენერლის, ალექსანდრ დვორნიკოვის დანიშვნასთანდ დაკავშირებით ამბობს, რომ წარსული გამოცდილებიდან გამომდინარე, სავარაუდოდ, ის გააგრძელებს სისასტიკეს.

"ვფიქრობ, სამწუხაროდ, ყველა ელის იმას, რომ სასტიკი ტაქტიკა, მშვიდობიანი მოსახლეობისა და ინფრასტრუქტურის უგულებელყოფა გაგრძელდება, ვინაიდან ისინი ახლა ფოკუსირებული არიან დონბასში გეოგრაფიულად შეზღუდულ ტერიტორიაზე.

არ ვიცი იქნება თუ არა ახალი გენერალი ახალი სისხლიანი ტაქტიკის ავტორი, თუმცა იმის გათვალისწინებით, რაც წარსულში ვნახეთ, სავარაუდოდ რუსული სისასტიკის წიგნში ახალ ფურცელს ვშლით", — ამბობს კირბი.

9 აპრილს გავრცელდა ინფორმაცია იმის შესახებ, რომ ვლადიმერ პუტინმა უკრაინაში სამხედრო ოპერაციების ხელმძღვანელი შეცვალა და ალექსანდრ დვორნიკოვი დანიშნა.

დვორნიკოვი რუსეთის სამხედრო ოპერაციებს ხელმძღვანელობდა სირიაში 2015 წელს, როდესაც პუტინმა იქ ჯარები ბაშარ ალ-ასადის მხარდასაჭერად გაგზავნა.

გუშინ, 11 აპრილს აზოვის ბატალიონმა გაავრცელა ინფორმაცია მარიუპოლში ქიმიური იარაღის გამოყენების შესახებ. მათი განცხადებით, რუსეთის საოკუპაციო ძალებმა მარიუპოლში, დაახლოებით, ერთი საათის წინ უკრაინელი სამხედროებისა და მშვიდობიანი მოქალაქეების წინააღმდეგ გაურკვეველი წარმომავლობის მომწამვლელი ნივთიერება გამოიყენეს.