პრემიერმინისტრი ირაკლი ღარიბაშვილი იმეორებს, რომ აუცილებელია, შევინარჩუნოთ მშვიდობა და სტაბილურობა. მისი თქმით, არავითარი მე-2 ფრონტი საქართველოში არ იქნება. ღარიბაშვილმა ისაუბრა, რომ ეკონომიკა და ტურიზმი იზრდება, ექსპორტი იმატებს და ზოგადად, აქვს პოზიტიური მოლოდინი, მიუხედავად იმისა, რაც უკრაინაში ხდება.

"ეკონომიკა იზრდება, ტურიზმის მატება გვაქვს. 1-2 კვირაში საბოლოო მონაცემები გამოვა და ამის შესახებ მოგახსენებთ, მაგრამ ტურიზმის აღდგენა ძალიან სწრაფი ტემპით მიმდინარეობს. ჩვენ თუ შევადარებთ კოვიდამდე პერიოდს, თითქმის 80-90%-ით არის აღდგენილი 2019 წელთან შედარებით. ექსპორტი იზრდება, ახლა ჩვენ გვაქვს კონსულტაციები სხვადასხვა ინვესტორებთან. ჩვენ გვინდა, რომ დავიწყოთ ჰესების მშენებლობის პროექტებით, მათ შორის სახელმწიფოს ჩართულობით და ამის შესახებ ძალიან მალე მოგახსენებთ. ჩვენ გვაქვს გეგმა, რომ მათ შორის, სახელმწიფომაც მიიღოს მონაწილეობა დიდი პროექტების განხორციელებაში, ნაწილობრივ მონაწილეობა შეიძლება გადაწყდეს ჩვენი ჩართულობით, სახელმწიფოს ჩართულობით.

ასე რომ ჩვენ გვაქვს ძალიან პოზიტიური მოლოდინები, მიუხედავად იმისა, რაც ხდება უკრაინაში ეს უბედურება, ტრაგედია, ომი. ამიტომ ჩვენ უნდა შევინარჩუნოთ მშვიდობა, სტაბილურობა და განვითარებას ხელი შევუწყოთ. არავითარი მე-2 ფრონტი არ იქნება საქართველოში. ჩვენ ამას არ დავუშვებთ და გავაგრძელებთ ჩვენი მოქალაქეების და ჩვენი სახელმწიფოს დაცვას" — თქვა მან მთავრობის სხდომაზე.

ღარიბაშვილმა ჯერ კიდევ ომის დაწყების პირველივე დღეებში თქვა, რომ "9 წლის განმავლობაში ქვეყანამ მიაღწია მშვიდობას და სტაბილურობას". მისი შეფასებით, "არავითარი საშიშროება არ გვაქვს, რუსეთთან სიტუაციის დეესკალაცია მოვახერხეთ".