საქართველოს პრემიერმინისტრს, ირაკლი ღარიბაშვილს ეკონომიკაში "ძალიან პოზიტიური" მოლოდინები აქვს და აცხადებს, რომ თვეების განმავლობაში ორნიშნა ეკონომიკური ზრდა და ყველა სხვა მონაცემი ოპტიმიზმის საფუძველს აძლევთ. ამის შესახებ მან მთავრობის სხდომაზე ისაუბრა.

"ომის დაწყების დღიდან ძალიან მალე ერთ კვირაში ლარიც გაუფასურდა და ამ ყველაფერმა, რა თქმა უნდა, გავლენაც იქონია ფასებზე, თუმცა ახლა თქვენ ნახეთ, რომ მას შემდეგ, რაც ჩვენ კოორდინირებულად მოვახდინეთ ინტერვენციები სავალუტო ბაზარზე და ვნახეთ, რომ დასტაბილურდა სიტუაცია მკვეთრად, 3,05-ზე, თითქმის 3,00-ზეა ჩამოსული ლარის კურსი დოლართან მიმართებაში. ვითარება არის დასტაბილურებული, დავიჭირეთ სიტუაცია, კონტროლდება მაქსიმალურად, არავითარი პრობლემა არ არის.

შემოდინებები გრძელდება, ტურიზმი, ხედავთ, რომ ძალიან იზრდება, ტურისტების რაოდენობას ვხედავთ, რომ იზრდება ყოველდღიურად და ზოგადად, ეკონომიკაში გვაქვს ძალიან პოზიტიური მოლოდინები. კიდევ ვიმეორებ, რომ ბოლო თვეების განმავლობაში ჩვენ გვაქვს ორნიშნა ეკონომიკური ზრდა, ექსპორტი იზრდება და ყველა ეს მონაცემები გვაძლევს ოპტიმიზმის საფუძველს", — განაცხადა მან.

მიმდიანრე წლის თებერვალში, წინა წლის შესაბამის თვესთან შედარებით, რეალური მთლიანი შიდა პროდუქტი 14,6%-ით გაიზარდა.

ანგარიშის მიხედვით, 2022 წლის თებერვალში, წინა წლის შესაბამის პერიოდთან შედარებით ზრდა შეინიშნებოდა შემდეგ დარგებში: დამამუშავებელი მრეწველობა, ტრანსპორტი და დასაწყობება, ელექტროენერგიის, აირის, ორთქლის და კონდიცირებული ჰაერის მიწოდება, სასტუმროები და რესტორნები, უძრავ ქონებასთან დაკავშირებული საქმიანობა, ხელოვნება, გართობა და დასვენება და სამთომოპოვებითი მრეწველობა.

საქსტატის ანგარიშში მითითებულია, რომ იანვარ-თებერვალში საქონლის ექსპორტი 54,5%-ით, ხოლო იმპორტი 47,2%-ით გაიზარდა. შესაბამისად, საგარეო სავაჭრო ბრუნვა 49,3%-ით არის გაზრდილი.

მიმდინარე წლის თებერვალში ახლადრეგისტრირებულ საწარმოთა რაოდენობა წლიურად 6,9%-ით, 4 155-მდე შემცირდა. ამავე პერიოდში დღგ-ის გადამხდელ საწარმოთა ბრუნვამ 27,3%-ით 8,9 მილიარდ ლარამდე მოიმატა.

ეკონომიკური ზრდის ანგარიში ქვეყანაში არსებული ინფლაციის შესახებ მონაცემებსაც მოიცავს და აღნიშნულია, რომ იანვარში წლიური ინფლაცია 13,7%-იყო. აღსანიშნავია, რომ არსებული მონაცემებით, საქართველოში ინფლაცია ბოლო 10 წლის განმავლობაში ერთ-ერთ ყველაზე მაღალ ნიშნულზეა.