აუდიტორია 115-ის წევრებს მიაჩნიათ, რომ იკვეთება საგამოძიებო უწყებების დაინტერესება მოძრაობის წევრებით. ამის შესახებ On.ge-ს გიორგი არობელიძე ესაუბრა:

"ჩნდება ისეთი განცდა თითქოს ვიღაცას სურს, რომ ასე შეაშინოს თუ გააჩეროს აუდიტორია 115, რაც მე ვფიქრობ, რომ ნაკლებად გამოუვა."

არობელიძის თქმით, გამოცდის ორი-სამი დღით გადატანის პროცედურას ძალიან ბევრი სტუდენტი იყენებს. მისივე თქმით, თავად უნივერსიტეტის ადმინისტრაცია ამბობს, რომ ეს პრაქტიკა არის საგამოცდო სისტემის მოუქნელობის ბრალი.

შინაგან საქმეთა სამინისტრომ აუდიტორია 115-ის ზოგიერთი წევრის მიერ გამოცდების გადასატანად ყალბი დოკუმენტების შესაძლო დამზადებაზე გამოძიება დაიწყო.

აუდიტორია 115-ის წევრების მიერ გამოცდების გადასატანად ყალბი ცნობების შესაძლო დამზადებაზე სტატია გაზეთში კვირის პალიტრა გამოქვეყნდა.

შსს, ასევე, იძიებს აუდიტორია 115-ის წევრების მიერ საზოგადოებრივი მაუწყებლის შენობაში შეჭრის საქმესაც.