24 თებერვალს რუსეთი უკრაინაში შეიჭრა და ომი დაიწყო, რომელიც დღემდე გრძელდება. ამ ომში ერთ-ერთი ცენტრალური ფიგურა უკრაინის პრეზიდენტი ვოლოდიმირ ზელენსკია, რომელიც ქვეყნის დატოვებასა და დამალვაზე უარს აცხადებს, ოკუპანტებს არ ნებდება და ხალხს მუდმივად ამხნევებს.

რა თქმა უნდა, როგორი სიმტკიცეც არ უნდა გამოეჩინა პრეზიდენტს, ომი, რომელიც 40 დღეზე მეტია გრძელდება, მასზეც მოქმედებს. ცოტა ხნის წინ ზელენსკი ქალაქ ბუჩაში ჩავიდა და ოკუპანტების მიერ ჩადენილი დანაშაული მსოფლიოს კიდევ ერთხელ შეახსენა.

ცოტა ხნის წინ მსოფლიო უკრაინის ქალაქ ბუჩაში დატრიალებული ტრაგედიის ფოტოებმა შეძრა. მას შემდეგ, რაც ქალაქებისა და დასახლებების ნაწილზე უკრაინულმა ჯარებმა კონტროლი დაიბრუნეს, გავრცელდა როგორც ადგილობრივი, ასევე, საერთაშორისო მედიების გადაღებული ფოტო-ვიდეო მასალა, სადაც ჩანს, რომ ქუჩებში ადამიანების ცხედრები იყო, მათ ნაწილს კი ხელები ჰქონდა შეკრული.

მსოფლიომ ისიც შენიშნა, თუ როგორ შეიცვალა პრეზიდენტი გარეგნულად ომის დაწყებიდან დღემდე. სოციალურ ქსელებში ამ ცვლილების საილუსტრაციოდ ზელენსკის ორ ფოტოს ავრცელებენ.

ფოტო: Getty Images

ფოტო: Getty Images

პირველი ფოტო 22 თებერვალს, რუსეთის შემოჭრამდეა გადაღებული, როცა უკრაინა რუსების თავდასხმის მოლოდინში იყო. პრეზიდენტს შარვალ-კოსტიუმი აცვია. მეორე ფოტო 41 დღის შემდეგ ქალაქ ბუჩაშია გადაღებული. მას შარვალ-კოსტიუმის ნაცვლად სამხედრო ტანსაცმელი და ტყვიაგაუმტარი ჟილეტი აცვია და წვერს ატარებს. მისი გამომეტყველება რადიკალურადაა შეცვლილი, რაც, ბუჩაში დატრიალებული ტრაგედიის შემდეგ, სამწუხაროდ, გასაკვირი არცაა.

"მთელი ერის ლიკვიდაცია, ხალხის. ჩვენ უკრაინის მოქალაქეები ვართ. ჩვენ 100-ზე მეტი ეროვნება გვყავს. ეს არის ყველა ამ ერის განადგუება. ეს ევროპაში ხდება 21-ე საუკუნეში. ეს მთელი ერის წამებაა", — ასე შეაფასა ზელენსკიმ ბუჩაში მომხდარი ტრაგედია CBS News-თან ინტერვიუში.

ამავე თემაზე: