სახელმწიფო უსაფრთხოების სამსახური უკრაინას "სამართლებრივი რეაგირების მიზნით" დაზვერვის მიერ გავრცელებული ინფორმაციის დამადასტურებელი მტკიცებულებების მიწოდებას სთხოვს. აღსანიშნავია, რომ სუს უკრაინის დაზვერვის განცხადებას მეორე დღეს გამოეხმაურა.

"აღნიშნული ქმედება, საქართველოს კანონმდებლობით, წარმოადგენს სისხლის სამართლის განსაკუთრებით მძიმე კატეგორიის დანაშაულს. მოვუწოდებთ უკრაინულ მხარეს, დაუყოვნებლივ მოგვაწოდონ ამ ინფორმაციის დამადასტურებელი მტკიცებულებები, მათზე სამართლებრივი რეაგირების მიზნით. საქართველოს ხელისუფლება იქნება უკომპრომისო ამგვარი დანაშაულის ნებისმიერ შესაძლო შემთხვევასთან დაკავშირებით", — აცხადებს სუს.

უწყების თქმით, ინფორმაციის გაცვლის მიზნით, გუშინვე შეხვდნენ უკრაინის საელჩოს წარმომადგენელს და დაინტერესდნენ აღნიშნული ინფორმაციის გავრცელების საფუძვლებით, ასევე, მოითხოვეს დეტალური ინფორმაციის გაზიარება საკითხთან დაკავშირებით. სუს-ის განცხადებით, თუ უკრაინა ქართულ მხარეს ინფორმაციას არ მიაწვდის, ჩაითვლება, რომ დაზვერვის განცხადება "წინასწარგანზრახული დეზინფორმაციაა".

"შევახსენებთ უკრაინულ მხარეს, რომ ასეთი ინფორმაციის ურთიერთგაცვლა არაერთი სახელმწიფოთაშორისი ხელშეკრულებით არის განსაზღვრული. წინააღმდეგ შემთხვევაში, ჩაითვლება, რომ გავრცელებული განცხადება წინასწარგანზრახული დეზინფორმაციაა, წარმოადგენს უკიდურესად არამეგობრულ და პროვოკაციულ ნაბიჯს და მიზნად ისახავს საქართველოში შიდა არეულობის პროვოცირებას, რომელიც ნებსით თუ უნებლიეთ, ემსახურება მხოლოდ საქართველოსადმი მტრულად განწყობილი ძალების ინტერესებს", — ვკითხულობთ განცხადებაში.

უკრაინის დაზვერვა აცხადებს, რომ რუსეთი ცდილობს საქართველოს ტერიტორიიდან კონტრაბანდული საქონლის შეტანას, რაშიც საქართველოს მთავრობა ხელს უწყობს. მათი განცხადებით, ქართულმა სპეცსამსახურებმა მიიღეს დავალება პოლიტიკური პირებისგან, რომ არ ჩარეულიყვნენ ამ საკითხში. დაზვერვაში აცხადებენ, რომ დღეს ცნობილია რუსეთის ფედერაციისთვის სამხედრო პროდუქციის მიწოდების კიდევ ერთი არხი, აღმოსავლეთ აზია. მათივე თქმით, განიხილება საქართველოსა და რუსეთის ფედერაციას შორის საჰაერო მიმოსვლის აღდგენის შესაძლებლობა.

გაიგე მეტი: