მოსკოვისა და სრულიად რუსეთის პატრიარქმა კირილემ რუსეთის შეიარაღებული ძალების მთავარ ტაძარში წირვა ჩაატარა, სადაც ამტკიცებდა, თითქოს რუს ხალხს არ აქვს სურვილი აწარმოოს ომი ან ზიანი მიაყენოს სხვებს. თუმცა იქვე კირილეს განცხადებები ომს ამართლებდა — მან ხაზი გაუსვა, რომ რუსები "სამშობლოს იცავენ". მის ციტატას BBC-ის რუსული ბიურო ავრცელებს.

"ჩვენ ვართ მშვიდობისმოყვარული ქვეყანა და ძალიან ტანჯული ხალხი ვართ, რომლებიც ომით ისე დაზარალდა, როგორც არც ისე ბევრი ევროპული ქვეყანა. ჩვენ არ გვაქვს არანაირი სწრაფვა ომისკენ ან რაიმე ისეთისკენ, რამაც შეიძლება ზიანი მიაყენოს სხვებს. მაგრამ ჩვენ ისე ვართ აღზრდილები ჩვენი ისტორიით, რომ გვიყვარს ჩვენი სამშობლო და მზად ვიქნებით დავიცვათ ის, როგორც მხოლოდ რუსებს შეუძლიათ სამშობლოს დაცვა", — განაცხადა კირილემ.

უკრაინაში რუსეთის შეჭრის დაწყებიდან მოსკოვის პატრიარქს მწვავედ აკრიტიკებენ რუსული ჯარების ქმედებების მხარდაჭერისა და უკრაინაში მშვიდობიანი მოსახლეობის მსხვერპლების შესახებ დუმილის გამო. თუმცა ეს გასაკვირი არც არის, კირილე წლების განმავლობაში მხარს უჭერდა და ამართლებდა პუტინის ქმედებებს.