ჯოან მაკდონალდის ისტორია მისი შემართებით იწყება. მან ვარჯიში კიბეებზე ასვლა-ჩამოსვლით დაიწყო და მერე უკვე ინსტაგრამზე მილიონი გამომწერიც დააგროვა, ოღონდ უნდა გაითვალისწინოთ, რომ მან სოციალური მედიის ცნობილ სახედ ქცევა 70 წელს გადაცილებულმა შეძლო.

ჯოანის ტრანსფორმაცია ხუთი წლის წინ დაიწყო, როცა ის ართრიტმა და დაღლილობის შეგრძნებამ შეაწუხა. ჩამოთვლილ პრობლემებს მაკდონალდი აქტიური ცხოვრების წესით ებრძოდა.

ჯოანისთვის ყველაზე რთული პერიოდი მაშინ დადგა, როცა ექიმმა უთხრა, რომ მისი არტერიული წნევა მატულობდა და კვლავ დასჭირდებოდა წამლების გაზრდა. ჯოანის შვილი, ფიტნესის მწვრთნელი მიშელ მაკდონალდი, დედას ხშირად სტუმრობდა და ცხოვრების წესის გაუმჯობესებას სთხოვდა.

"როცა მიშელმა არჩევანის წინაშე დამაყენა, მივხვდი, რომ რაღაც აუცილებლად უნდა გამეკეთებინა, შემეცვალა რაიმე ახლა ან არასდროს. თავს ძალიან ცუდად ვგრძნობდი და ჩემი სიცოცხლეც უფრო არსებობას ჰგავდა, ვიდრე ცხოვრებას", — ამბობდა ჯოანი

2017 წლის იანვარში, 71 წლის იუბილემდე სულ რამდენიმე კვირით ადრე, ჯოან მაკდონალდი კანადიდან მექსიკაში გაემგზავრა, სადაც თავის შვილს, მიშელსა და მის ქმარს სპორტდარბაზი ჰქონდათ და ვარჯიშიც იქვე დაიწყო. ჯოანმა მიშელის მიერ შემუშავებული დიეტური პროგრამის დაცვაც დაიწყო, რომელიც ორიენტირებული იყო საკმარისი მაკროელემენტების — ცხიმების, ნახშირწყლებისა და ცილების სწორ მიღებაზე, რაც დღეში ხუთჯერადად კვებას გულისხმობდა.

ჯოან მაკდონალდის თქმით, მას მოტივაციას აძლევდა ის შედეგი, რასაც ვარჯიშის შემდეგ ხედავდა. მან დაახლოებით 5 კილო ვარჯიშის პირველ თვეში დაიკლო და ძალიან მალევე მედიკამენტების განახევრებით შემცირებაც შეძლო. კანადაში დაბრუნების შემდეგაც არ წყვეტდა ჯანსაღი წესით ცხოვრებას, მიღებულ საკვებს გულდასმით აკონტროლებდა და ცდილობდა, მუდმივად აქტიურ რეჟიმში ყოფილიყო.

"კვირაში ხუთი დღე სპორტდარბაზში დავდივარ", — ამბობს ჯოანი. "მე მომწონს ეს რუტინა, რადგან ის გაძლევს რაღაც ისეთს, რასაც მოუთმენლად ელოდები."

ბოლო ოთხი წლის განმავლობაში ჯოანი წონას ინარჩუნებდა და აღარ ჰქონდა მაღალი წნევისა და მაღალი ქოლესტერინის პრობლემები: მან თითქმის 30 კილოს დაკლება შეძლო.

ამ წარმატების შემდეგ ის შვილმა დაარწმუნა, რომ ინსტაგრამის გვერდი უნდა შეექმნა, სადაც თავის გამოცდილებას სხვებსაც გაუზიარებდა. ასეც მოიქცა და შედეგი წარმატებულიც აღმოჩნდა: მას ამჟამად 1,6 მილიონზე მეტი გამომწერი ჰყავს.

მაკდონალდი ამბობს, რომ არასდროსაა გვიანი, შენი ცხოვრების წესი შეცვალო, მიუხედავად იმისა, თუ რამდენი წლის ხარ. თავის ინსტაგრამგვერდზე მის მიერ შემუშავებულ ხუთ წესს გვიზიარებს, რომელიც ადამიანებს ჯანმრთელობისა და ახალგაზრდობის შენარჩუნებაში დაეხმარება:

  • ყურადღება მიაქციეთ ძილს — მრავალი კვლევა ადასტურებს, რომ 8 საათზე ნაკლები ძილი უარყოფითად მოქმედებს ჰორმონალურ და კოგნიტიურ ფუნქციებზე. ძილის ნაკლებობა აისახება თქვენს სხეულზეც.
  • დალიეთ ბევრი წყალი და მიიღეთ ბევრი ცილოვანი საკვები — ეს იდეალური წონის შენარჩუნებაში დაგეხმარებათ.
  • გააქტიურდით. შეგიძლიათ დაიწყოთ სიარულით — 10 000 ნაბიჯის გადადგმა კარგი დასაწყისია.
  • ეცადეთ, დადებითი განწყობა შეინარჩუნოთ — ეს მიზნის მიღწევას გაგიმარტივებთ.
  • აუცილებლად აღბეჭდეთ თქვენი პროგრესი — გადაიღეთ ფოტო ვარჯიშის დაწყებამდე და მის შემდეგ, ეს აამაღლებს თქვენს მოტივაციას და თავდაჯერებულობას შეგმატებთ.