ქართული ოცნების დეპუტატმა, ბექა დავითულიანმა უკრაინაში დაღუპულ ქართველ მებრძოლებზე საუბრისას თქვა, რომ ხვალ და ზეგ თბილისში არ არის, მაგრამ როცა ჩამოვა, პანაშვიდზე მივა. ეს განცხადება მან პარლამენტში ჟურნალისტებთან გააკეთა.

"ყველა პატივს მიაგებს ისე, როგორც მიაჩნია. მივლენ პანაშვიდზე ალბათ და დაესწრებიან ადამიანები. რა ვიცი, მეც ხვალ და ზეგ თბილისში არ ვარ, მაგრამ როცა ჩამოვალ აუცილებლად მივალ", — თქვა მან.

დავითულიანმა თქვა ისიც, რომ მათი ჩამოსვენების ხარჯები გაიღო სახელმწიფომ და "უწევს ორგანიზებას მათ ღირსეულად გაცილებას ამ ქვეყნიდან".

"პატივს მივაგებ და ვიზიარებ ამ ადამიანების ოჯახების მწუხარებას. მათი ჩამოსვენების ხარჯები გაიღო სახელმწიფომ და მათ მიმართ სახელმწიფომ გამოხატა პატივისცემა იმით, რომ სრულად ასე ვთქვათ, უწევს ორგანიზებას მათ ღირსეულად გაცილებას ამ ქვეყნიდან", — ამბობს დავითულიანი.

დღეს, 24 მარტს უკრაინაში დაღუპული გია ბერიაშვილისა და დავით რატიანის ცხედრები საქართველოში გადმოასვენეს. დაღუპულთა ხსოვნას მოქალაქეებმა პატივი მიაგეს, ისინი მუხლმოდრეკილი და სანთლებით დახვდნენ უკრაინაში დაღუპულ გმირებს. მათ შორის იყო პრეზიდენტი სალომე ზურაბიშვილიც. ჩამოსვენებას არ ესწრებოდა მთავრობის არცერთი ლიდერი.