პარტია გირჩი — მეტი თავისუფლების ლიდერის, ზურაბ ჯაფარიძის განცხადებით, ნეიტრალიტეტი ნიშნავს რუსეთში დაბრუნებას, განუვითარებლობას, მონობას. მისი თქმით, გულუბრყვილობა, ისტორიის უცოდინარობა და დღევანდელი რუსეთის რაობის ვერ გააზრებაა იმის ფიქრი, რომ რუსეთის დამოკიდებულება განპირობებულია ჩვენი ნატოსკენ სწრაფვით.

"ანუ, იტყვი "ნეიტრალური ვარ" და მორჩა? შეგეშვებიან? აქამდე როგორ ვერ მოვიფიქრეთ ეს? აქამდე როგორ ვერ მოიფიქრა ყველა პატარა/სუსტმა სახელმწიფომ რომ ეს ეთქვა და დაემთავრებინა ომები დედამიწაზე? მეოთხე კლასში რატომ არ ვასწავლით რომ ამის თქმა ასეთი მნიშვნელოვანია? ნეიტრალიტეტი ჩვენთვის, დღეს და ახლა, ნიშნავს რუსეთში დაბრუნებას, განუვითარებლობას, მონობას.

გულუბრყვილობა, ისტორიის უცოდინარობა და დღევანდელი რუსეთის რაობის ვერ გააზრებაა იმის ფიქრი, რომ რუსეთის ჩვენდამი დამოკიდებულება განპირობებულია ჩვენი ნატოსკენ სწრაფვით", — ამბობს ჯაფარიძე.

როგორც ჯაფარიძე წერს, რუსეთს არ უნდა, შევძლოთ წარმატებული ლიბერალური დემოკრატიის შექმნა, რადგან ამან შეიძლება დააფიქროს რუსეთის მოქალაქეები იმაზე რომ მათაც სურთ ასეთი ქვეყანა. მისივე თქმით, კრემლს არ სურს, გვქონდეს კარგი სასამართლო და ამის გამო, მისი შიშით, "უნდა გავაგრძელოთ მურუსიძე-ჩინჩალაძის სასამართლოთი ცხოვრება?".

"რუსეთს არ უნდა რომ ჩვენ გვქონდეს სიტყვის და გამოხატვის თავისუფლება, რადგან რუსებმაც თუ იგივე მოინდომეს თავისთან, ესეც საფრთხეა იქ არსებული რეჟიმისთვის
რა ვქნათ, შევიზღუდოთ თავი აზრების თავისუფალი გამოხატვისგან, რუსეთის შიშით?
რუსეთს არ უნდა მეზობლად წარმატებული, კერძო საკუთრებაზე დაფუძნებული საბაზრო ეკონომიკა, რადგან ესეც საფრთხეს აჩენს რომ იგივე შეიძლება მოითხოვონ რუსებმა შინ. რა ვქნათ, ჩავრჩეთ კიდევ დიდხანს საბჭოთა საქართველოში როგორც ჩავრჩით ეს 30 წელი, რუსეთის შიშით?

რუსეთს არ უნდა რომ ჩვენ გვქონდეს ბევრი ფული, ვიყოთ მდიდრები, რადგან მერე შეიძლება ბოლომდე დავიკიდოთ ეგ ბოროტების მოდიფიცირებული იმპერია. რა ვქნათ, დავრჩეთ ღარიბები და განუვითარებლები და ამ ჭაობში დავტოვოთ ჩვენი შვილებიც, რუსეთის შიშით?", — წერს ის.

ჯაფარიძის თქმით, რუსეთს არ უნდა, საქართველოში არჩევნებით იცვლებოდეს ხელისუფლება და გავხდეთ ცივილიზებული სამყაროს ნაწილი.

"რუსეთს არ უნდა ჩვენ ოდესმე ვისწავლოთ და შევძლოთ საკუთარი თავის დაცვა, რადგან მერე ვეღარ შეგვაშინებს, ვეღარ დაგვაჩმორებს. რა ვქნათ, დავრჩეთ უღირს ჩმორებად და იგივესთვის გავწიროთ შვილებიც, რუსეთის შიშით?

რუსეთს არ უნდა რომ აქ გაიაროს ტვირთებმა, ნავთობმა, გაზმა, მაგიტომ ჩაკლა ანაკლიის პროექტიც, რადგან თვითონ აქვს ინტერესი სატრანზიტო ფუნქციის შესრულებაში. რა ვქნათ, ყველაფერზე უარი ვთქვათ რამაც შეიძლება ფული მოგვიტანოს, რუსეთის შიშით?", —აცხადებს ჯაფარიძე.

მისი შეფასებით, ე.წ. ნეიტრალიტეტი სინამდვილეში ნიშნავს "უარის თქმას ყველაფერზე, რაც ჩვენს სასიცოცხლო ინტერესებშია". ჯაფარიძის თქმით, ეს დასრულდება რუსეთის მხრიდან "ჩვენი ჩაყლაპვით", როგორც კი ამის ხელსაყრელი მომენტი დაუდგება.