ახალგაზრდა უკრაინელი თაობა, რომელმაც ომის შესახებ მხოლოდ ისტორიის წიგნებიდან და მოყოლილი ამბებიდან იცოდა, ახლა იძულებულია, რომ საბრძოლველად მოემზადოს. ზოგიერთმა ახალგაზრდა უკრაინელმა კი გადაწყვიტა, რომ იარაღით ბრძოლა თავის პარტნიორთან ერთად ისწავლოს და სამშობლო ასე დაიცვას.

ქალაქ ოდესის ის ადგილი, სადაც ადრე ახალგაზრდა უკრაინელები ყავის დასალევად და მეგობრებთან შესახვედრად იკრიბებოდნენ, ახლა საბრძოლო სასწავლო ცენტრად გადაკეთდა. ახალგაზრდა წყვილები სასწავლო ცენტრში ყოველდღე მიდიან, რათა იარაღის გამოყენება და პირველადი სამედიცინო დახმარების აღმოჩენა ისწავლონ.

"ყველა ადამიანს უნდა შეეძლოს იარაღის გამოყენება და დაჭრილებისთვის პირველადი სამედიცინო დახმარების აღმოჩენა", — ამბობს 26 წლის გრაფიკული დიზაინერი, ოლგა მოროზი. ოლგა თავის 32 წლის შეყვარებულთან ერთად, რომელიც პროფესიით გაყიდვების მენეჯერია, იარაღით ბრძოლას სწავლობს.

წყვილი დაქორწინებას ზაფხულში გეგმავდა, თუმცა რუსეთის უკრაინაში შეჭრამ მათი ცხოვრება და გეგმები თავდაყირა დააყენა. ახლა ისინი სხვა უკრაინელებთან ერთად იარაღის გამოყენებას სწავლობენ და იმ დღისთვის ემზადებიან, როცა რუსეთის ჯარები მათ ქალაქს მოადგება.

ფოტო: Reuters

ოდესა, რომელიც შავი ზღვის სანაპიროზე მდებარეობს, რუსეთის ძალებისთვის ერთ-ერთ მნიშვნელოვან სტრატეგიულ სამიზნედ განიხილება. მართალია, ჯერ ქალაქი რუსებს არ დაუკავებიათ, თუმცა ოდესის აღმოსავლეთით მდებარე მარიუპოლი უკვე რამდენჯერმე დაიბომბა.

"უკრაინა ახლა მარტოა და ადამიანებმა, რომლებიც ჩვენ გვიყურებენ, უნდა გაიგონ, რომ ხვალ მათი მეგობრები და ქვეყანა იგივე მდგომარეობაში შეიძლება აღმოჩნდეს", — ამბობს ოლგას შეყვარებული.