საქართველოს პრემიერმინისტრმა, ირაკლი ღარიბაშვილმა პოლონეთის პრემიერმინისტრთან მათეუშ მორავიეცკთან გამართულ შეხვედრაზე გაიხსენა და სამწუხარო უწოდა ფაქტს, რომ მსოფლიოს ლიდერებმა ადვისტოს ომის შემდეგ რუსეთს სანქციები არ დაუწესეს. მან ასევე გაიხსენა 2008 წელს ლეხ კაჩინსკის მხარდაჭერა და მის მიმართ პატივისცემა დააფიქსირა.

"ჩვენი ტერიტორიის 20% დღეს არის ოკუპირებული რუსეთის მიერ. ჩვენ ვცხოვრობთ რუს ჯარისკაცებთან ერთად ჩვენს ტერიტორიაზე. მე მინდა აქვე სინანულით გავიხსენო და შევახსენო ყველას, რომ სამწუხაროდ, აგვისტოს ომის შემდეგ რუსეთის მიმართ არავითარი სანქციები არ იქნა დაწესებული მაშინდელი მსოფლიო ლიდერების მხრიდან. აქვე მინდა გავიხსენო პრეზიდენტი კაჩინსკი, რომელიც მაშინ ხმამაღლა მოუწოდებად დასავლეთის ლიდერებს მიეღოთ მკვეთრი და თამამი გადაწყვეტილებები საქართველოს ევროინტეგრაციასთან დაკავშირებით", — თქვა ღარიბაშვილმა.

მან ისაუბრა, რომ 2008 წლის შემდეგ რუსეთთან განახლდა სავაჭრო ურთიერთობები. ღარიბაშვილმა პრესკონფერენციაზე ნაციონალური მოძრაობაც ახსენა და თქვა, რომ თავად მთავრობამაც არ დააწესა სანქციები 2008 წელს. მისი მტკიცებით, ომის შემდეგ, ენმ-მ რუსებს გადასცა სტრატეგიული ობიექტები და მოუხსნა სავიზო რეჟიმი.

"ჩვენ ვნახეთ განახლებული პოლიტიკა რუსეთის მიმართ, ახალი სავაჭრო ეკონომიკური პროექტები და არავითარი სანქცია კიდევ ერთხელ მინდა გავიმეორო, სამწუხაროდ. უფრო მეტიც, სამწუხაროდ მაშინდელმა ქართულმა ხელისუფლებამაც კი არ დაუწესა სანქციები რუსეთს, მხოლოდ დიპლომატიური ურთიერთობები გაწყდა", — ამბობს ის.

დღეს, 17 მარტს საქართველოს სამუშაო ვიზიტით პოლონეთის პრემიერმინისტრი, მათეუშ მორავიეცკი ეწვია. ვიზიტის ფარგლებში პრემიერმინისტრები პრეზიდენტ ლეხ კაჩინსკის ძეგლს, რომელიც ახალ ბულვარში დაიდგა, ერთობლივად გახსნიან.