პუტინის პრესსპიკერის, დმიტრი პესკოვის განცხადებით, მოსკოვი ვერ გაითვალისწინებს საერთაშორისო სასამართლოს გადაწყვეტილებას, რომელიც მოითხოვდა უკრაინაში სამხედრო ოპერაციის დაუყოვნებლივ შეწყვეტას.

"არა, ჩვენ ვერ გავითვალისწინებთ ამ გადაწყვეტილებას, საერთაშორისო სასამართლოს აქვს ასეთი გაგება, როგორიცაა მხარეთა თანხმობა, აქ ვერიანაირი თანხმობა ვერ იქნება. ამ შემთხვევაში ეს არის ის, რასაც ვერ გავითვალლისწინებთ", — განაცხადა მან.

გუშინ, 16 მარტს საერთაშორისო სასამართლომ მოუწოდა რუსეთს, დაუყოვნებლივ შეწყვიტოს საომარი მოქმედებები უკრაინაში. დროებითი ღონისძიება სასამართლომ უკრაინის მიმართვის შემდეგ მიიღო.

სასამართლომ 13 ხმით 2-ის წინააღმდეგ გადაწყვიტა, რომ რუსეთმა უკრაინის ტერიტორიაზე 24 თებერვალს დაწყებული სამხედრო აგრესია დაუყონებლივ უნდა შეაჩეროს. ასევე, 13 ხმით 2 წინააღმდეგ სასამართლო რუსეთს ავალდებულებს უზრუნველყოს, ნებისმიერმა სამხედრო ან არარეგულარულმა შეიარაღებულმა დანაყოფმა, რომელსაც ის ხელმძღვანელობს ან მის მიერაა მხარდაჭერილი, ისევე, როგორც ნებისმიერმა ორგანიზაციმ ან პირმა, რომელიც მას ექვემდებარება არ გადადგას ნაბიჯები პირველ პუნტქში მითითებული სამხედრო ოპერაციის გასაგრძელებლად.