უკრაინის პირველი ლედი, ოლენა ზელენსკა, ქვეყანაში მიმდინარე ომზე, საფრთხეებსა და თავისი ქმრის გადაწყვეტილებებზე საუბრობს. ABC News-ისთვის წერილობით მიცემულ ინტერვიუში, ზელენსკამ რუსების თავდასხმებით მშვიდობიანი უკრაინელების, მათ შორის, ბავშვების, დახოცვას "გენოციდი" უწოდა.

• პუტინის ომი უკრაინაში — განახლებადი

"მგონი, ჩემი სათქმელი ძალიან ჰგავს მთელი მსოფლიოს სიტყვებს. მხოლოდ ორი უბრალო სიტყვა: შეაჩერეთ ომი", — აცხადებს 44 წლის ზელენსკა, რომელთანაც სატელეფონო საუბარი უსაფრთხოების გამო შეუძლებელია.

ოლენას ქმარი, ვოლოდიმირ ზელენსკი, რომელიც 2019 წელს უკრაინის პრეზიდენტი გახდა, რუსეთის აგრესიის მსხვერპლ ქვეყანას ხელმძღვანელობს. ომამდე პირველი ლედი სხვადასხვა სოციალურ საკითხზე, მაგალითად, სკოლებში საკვების ხარისხის გაუმჯობესებაზე, ზრუნავდა, თუმცა, 24 თებერვლის შემდეგ მისი პრიორიტეტები სრულიად შეიცვალა. ომის გამო დღეს საკუთარი სახლი თითქმის 3 მილიონ უკრაინელს აქვს დატოვებული.

• 20 ფოტო, რომელიც გაჩვენებთ, რა გზას გადიან უკრაინელი ლტოლვილები

"დაგვეხმარეთ, ბოლო მოვუღოთ რუსეთის სისასტიკეს უკრაინაში", — ამბობს ზელენსკა, რომელიც სოციალური მედიის საშუალებით მსოფლიოს ქვეყანაში მცხოვრები ადამიანების მდგომარეობას აცნობს.

"როცა რუსეთი ამბობს, რომ ეს 'მშვიდობიანი მოსახლეობის წინააღმდეგ მიმართული ომი' არაა, დახოცილი ბავშვების სახელებს ვახსენებ", — დასძენს პირველი ლედი.

მაშინ, როდესაც უკრაინული სამსახურების ცნობით, ქვეყნის პრეზიდენტი რუსეთის პირველი სამიზნეა, ოლენა, რა თქმა უნდა, ქმარზეც დარდობს, თუმცა, მისი შეუპოვრობის სჯერა.

"როგორც უკრაინაში მცხოვრებ ყველა ქალს, ჩემი ქმრის გამო მეც მეშინია", — ამბობს ზელენსკა, — "ყოველ დილით, სანამ დავურეკავ, ვლოცულობ, ყველაფერი კარგად იყოს. თუმცა, ისიც ვიცი, როგორი ძლიერი და ამტანია. შეუძლია, ყველაფერს გაუძლოს, განსაკუთრებით, როცა საქმე ხალხისა და იმ ყველაფრის დაცვას ეხება, რაც უყვარს".

პუტინსა და კრემლის პოლიტიკის მხარდამჭერებზე საუბრისას უკრაინის პირველი ლედი აღნიშნავს, რომ ისიც ეეჭვება, "თუკი მათ საერთოდ გააჩნიათ ადამიანური გრძნობები".

ზელენსკა არც დასავლელი ლიდერების კრიტიკას მორიდებია.

"დღეს ჩვენი ქვეყანა და მოქალაქეები მძიმე საფასურს იხდიან ამ პრობლემაზე მათი დუმილისა და ყოყმანისთვის", — ამბობს ოლენა, — "ამას ცოტა ხნის წინ უდანაშაულო ქალები და ბავშვები შეეწირნენ მარიუპოლის სამშობიარო სახლში. რუსეთის ომის გამო ჩვენ 71 ბავშვი დავკარგეთ — ეს უკრაინელი ხალხის გენოციდია.

"ამას გარდა, მარიუპოლში, ხარკოვში, ირპინში, სუმიში და სხვა ქალაქებში მილიონობით ადამიანი იტანჯება. არ აქვთ წყალი, საკვები და მედიკამენტები. რუსი სამხედროები მათამდე ჰუმანიტარულ დახმარებასაც არ უშვებენ. ჩვენ ეს უნდა შევაჩეროთ. 'ჩვენში' კი მთელ მსოფლიოს ვგულისხმობ".

• უკრაინის პირველმა ლედიმ საერთაშორისო თანამეგობრობას მოუწოდა, დახურონ ცა უკრაინის თავზე

ზელენსკა "ამერიკის, ევროპისა და მთელი მსოფლიოს" მოქალაქეებს სთხოვს, თავიანთ ლიდერებს პასუხისმგებლობა დააკისრონ იმისთვის, რომ "ათწლეულების განმავლობაში წყნარად აკვირდებოდნენ რეჟიმს, სადაც აზრის გამოთქმა არ შეიძლებოდა და სადაც ხალხი მონებად გადაიქცა, გაიზარდა და გაძლიერდა.

"ლიდერებმა პატივისცემის მოპოვების შანსი უკვე დაკარგეს, თუმცა, თქვენ — ჯერ არა", — ეუბნება ზელენსკა მსოფლიოს მოქალაქეებს, — "დღეს სასიცოცხლოდ მნიშვნელოვან გადაწყვეტილებებს იღებენ ის ადამიანები, რომლებიც საკუთარ ქვეყანაში თანამდებობაზე თქვენ აირჩიეთ. თქვენ მიეცით და კვლავ აძლევთ მათ უფლებას, თქვენი სახელით იმოქმედონ. და როცა ისინი არ მოქმედებენ, როცა ჩვენი შვილების სიკვდილს უშვებენ — ამის უფლებასაც თქვენ აძლევთ".

უკრაინის პირველი ლედი ასევე დასძენს, რომ აუცილებელია, დასავლეთმა გააცნობიეროს, "უკრაინა ევროპასა და მათ საერთო ღირებულებებს" იცავს.

"ყოველდღიურად იზრდება ის საფასური, რასაც უკრაინა ამ ღირებულებების დასაცავად იხდის", — აცხადებს ზელენსკა, — "ამ ბრძოლაში კი ჩვენ უფრო ვძლიერდებით და მტკიცე ვხდებით. ნეტავ, აშშ-ისა და ევროკავშირის რუსეთისთვის დაწესებული სანქციებიც ძლიერდებოდეს და მტკიცე ხდებოდეს".

ზელენსკამ უკრაინელ ქალებსაც მიმართა და ისინი გაამხნევა.

"თქვენ ახალ სიცოცხლეს თავშესაფრებში ბადებთ, ბავშვებს იავნანებით ამშვიდებთ, სანამ რუსული ავიაცია ჩვენს მშვიდობიან უკრაინულ ქალაქებს ანადგურებს", — მიმართავს პირველი ლედი ქალებს, — "თქვენს ძლიერებას ვაღმერთებ. ძლიერებას, რომელიც უროზე მტკიცე ხდება".

უკრაინელი ქალების გარდა, ზელენსკას სათქმელი ჰქონდა ამერიკელი ქალებისთვისაც.

"მოგმართავთ თქვენ, ამერიკაში მცხოვრებ ქალებს და გთხოვთ, მხარი დაუჭიროთ უკრაინელ ქალებსა და ბავშვებს, რომლებიც ომს გაექცნენ და თქვენს ქვეყანაში თავშესაფარს ეძებენ", — ამბობს ოლენა, — "სანამ ჩვენ უკრაინისთვის, ევროპისა და მთელი მსოფლიოსთვის ვიბრძვით, კეთილშობილებისა და ჰუმანურობის ყოველი გამოხატვა კრიტიკულად მნიშვნელოვანია".

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში