ქართული ოცნების დეპუტატი, დიმიტრი ხუნდაძე პროპუტინისტურ, ჰომოფობიურ და ძალადობრივ ალტ-ინფოს პარტიას აკრიტიკებს. მისი თქმით, მათ მიერ დაფუძნებული პარტია რუსული პოლიტიკის ღია პროპაგანდას ეწევა.

"არ შემიძლია არ შევეხო ახლად დაფუძნებული კონსერვატიული პარტიისა და მისი ტელევიზიის, ალტ-ინფოს ქმედებას და რუსული პოლიტიკის ღია პროპაგანდას. დღეს, როდესაც მთელი მსოფლიო სუნთქვაშეკრული უყურებს უკრაინის მოვლენებს, თუ როგორ ბომბავს რუსეთი მშვიდობიან მოსახლეობას, ერთი კითხვა მაქვს მათთან — ხვალ რომ საქართველო რუსეთთან ომში ჩაებას, ვის მხარეს იბრძოლებთ? თუ ისევ დარჩებით საკუთარ ოფისებში. საქართველოში სიტყვის თავისუფლებაც და პარტიული არჩევანიც ხელშეუხებელია, მაგრამ რადგან ასეთი კითხვა საზოგადოებაშიც ჩნდება, ე.ი ეს პრობლემაა", — განაცხადა მან.

გუშინ, 15 მარტს მათი პარტიის დამფუძნებელმა, კონსტანტინე მორგოშიამ თქვა, რომ უახლოეს პერიოდში მთელი "პარტიული დელეგაციით" რუსეთში მიდიან და შეხვდებიან მათ, "ვისაც ხელეწიფება საქართველო-რუსეთის ურთიერთობების დალაგება".

ძალადობრივმა, ჰომოფობიურმა და პრორუსულმა ალტ-ინფომ პარტია 20 ნოემბერს დააფუძნა, რომელსაც კონსერვატიული მოძრაობა უწოდეს. პარტიის თავმჯდომარედ 5 ივლისის ძალადობის ერთ-ერთი ორგანიზატორი ზურაბ მახარაძე აირჩიეს.

5-6 ივლისს ჯამში 50-ზე მეტ ჟურნალისტს, სამოქალაქო მოძრაობების ოფისებსა და მშვიდობიან მოქალაქეებს დაესხნენ თავს. ამ მოვლენების გამო სამოქალაქო საზოგადოებისა და ოპოზიციის ნაწილი შინაგან საქმეთა მინისტრის პასუხისმგებლობის საკითხის დაყენებას მოითხოვს, რადგან მიაჩნიათ, რომ მან მშვიდობიანი მოქალაქეების და ჟურნალისტების უსაფრთხოების დაცვა ვერ უზრუნველყო.

აღსანიშნია ისიც, რომ საქართველოს რამდენიმე ქალაქში მათ პარტიის ოფისის გახსნის საშუალება არ მისცეს.