უკრაინის პრეზიდენტმა ვლადიმირ ზელენსკიმ განაცხადა, რომ უკრაინის არმია მარიუპოლის ოკუპაციის ყოველ წუთზე ოკუპანტებს პასუხს აგებინებს.

"ტკივილით უნდა ვთქვა: მარიუპოლი რჩება მტრის მიერ დაბლოკილი, რუსმა ჯარებმა არ შეუშვეს ჩვენი დახმარება ქალაქში და აგრძელებენ ჩვენი ხალხის, ჩვენი მარიუპოლის მაცხოვრებლების წამებას.

ხვალ მაინც ვეცდებით. კიდევ ერთხელ გამოვგზავნით საკვებს, წყალს და სამედიცინო მასალებს ჩვენი ქალაქისთვის.

დარწმუნებული ვარ, უკრაინის შეიარაღებული ძალები პასუხს გასცემენ ჩვენი ხალხის ტანჯვის ყოველი წუთისთვის. და ეს არ არის პათოსი, არ არის საფრთხე. ეს არის რეალობის კონსტანტაცია",— განაცხადა მან.

11 მარტს მარიუპოლის მერმა განაცხადა, რომ რუსულ-ფაშისტურმა არმიამ მათ მოუწყო ჯოჯოხეთის, არმაგედონის ორი დღე. ასე ეხმაურება ის რამდენიმედღიან დაბომბვას, რომელსაც მშვიდობიანი მოქალაქეები, მათ შორის, ბავშვები ემსხვერპლნენ. მანამდე ზელენსკიმ აღნიშნა, რომ რუსული ძალები საკვებითა და მედიკამენტებით დატვირთულ დერეფნებს ტანკებით უტევდნენ და არ აძლევდნენ საშუალებას ქალაქში ჰუმანიტარული დახამრება შეეტანათ.

რუსულმა ჯარებმა მარიუპოლში დაბომბეს სამშობიარო სახლი, ბავშვთა საავადმყოფო, ფსიქონევროლოგიური პანსიონი. მათ რამდენიმე დღეა ტყვედ ჰყავთ ქალაქის მოსახლეობა, რომლებსაც საკვების, წყლისა და მედიკამენტების საჭიროება აქვთ.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში