საქართველოს პრემიერმინისტრი გიორგი კვირიკაშვილი აცხადებს, რომ ქართული ოცნების 5 წლის წინ დაფუძნებულმა პარტიამ, ქართულმა ოცნებამ, საქართველოში რეალური, დემოკრატიული ცვლილებები დაიწყო.

"დღევანდელ დღეს, 5 წლის წინ, ბიძინა ივანიშვილის მეთაურობით დაფუძნდა ახალი პოლიტიკური პარტია ქართული ოცნება - დემოკრატიული საქართველო, რომელიც დაუპირისპირდა რეპრესიულ მმართველობით სისტემას და დაიწყო ბრძოლა ავტორიტარული რეჟიმის წინააღმდეგ. პარტია ქართული ოცნება - დემოკრატიული საქართველოს პოლიტიკურ სივრცეში გამოჩენამ გააჩინა იმედი იმისა, რომ სწორედ ეს პოლიტიკური ძალა ხალხთან ერთად დაამარცხებდა მოძალადე ხელისუფლებას და სახელმწიფო ნორმალური განვითარების გზას დაადგებოდა.

სწორედ 5 წლის წინ, ბიძინა ივანიშვილმა ახლადშექმნილ პოლიტიკურ ძალასთან ერთად დაიწყო უკომპრომისო ბრძოლა და, თვეების განმავლობაში რეპრესიების, დარბევების, უკანონო დაპატიმრებების მიუხედავად, უსისხლოდ, ბრძოლის ერთადერთი იარაღით - პოლიტიკური მეთოდებით, არჩევნების გზით დაამარცხა არსებული რეჟიმი".

კვირიკაშვილი აცხადებს, რომ ქართული ოცნების მიზანია ერთიანი, დემოკრატიული და ძლიერი საქართველო, სახელმწიფო, რომელიც თითოეული მოქალაქის უფლებებისა და კეთილდღეობისთვის ზრუნავს.

ბიძინა ივანიშვილმა პოლიტიკური ინტერესები 2011 წლის ოქტომბერში გაახმოვანა, ხოლო იმავე წლის დეკემბერში დააფუძნა საზოგადოებრივი მოძრაობა ქართული ოცნება.

2012 წლის თებერვალში მან პარტიის საინიციატივო ჯგუფი დაასახელა და გააფორმა კოალიცია რესპუბლიკურ პარტიასთან, თავისუფალ დემოკრატებთან და ეროვნულ ფორუმთან ერთად.

აპრილში, კოალიციას მრეწველობა გადაარჩენს საქართველოს შეუერთდა.

პარტია ქართული ოცნება — დემოკრატიული საქართველო ოფიციალურად 2012 წლის 21 აპრილს დაფუძნდა.