2 ივნისს, არსებული ნარკოპოლიტიკის წინააღმდეგ, ყოველწლიური აქციის ჩატარება იგეგმება ლოზუნგით "არ დაიჭირო".

აქცია საქართველოს მასშტაბით 4 ქალაქში გაიმართება: თბილისში - მთავრობის კანცელარიის წინ, ბათუმში - ერას მოედანზე, ქუთაისში - პარლამენტის წინ და რუსთავში - მერიის წინ.

2 ივნისის მოძრაობამ და მისმა მხარდამჭერებმა ნარკოპოლიტიკის წინააღმდეგ საპროტესტო აქციები დღეს, 30 მაისს დააანონსეს.

მათი მოთხოვნებია:

  • ყველა სახის ნარკოტიკის მოხმარებისთვის და პირადი მოხმარებისთვის მცირე ოდენობით შეძენა/შენახვისთვის სისხლის სამართლებრივი პასუხისმგებლობის გაუქმება.
  • ნარკოტიკების მოხმარებისთვის და პირადი მოხმარებისთვის მცირე ოდენობით შეძენა/შენახვისთვის ადმინისტრაციული პასუხისმგებლობის გაუქმება (საზოგადოებრივი თავშეყრის ადგილებში მოხმარების პროცესის ან არაფხიზელ მდგომარეობაში ავტოსატრანსპორტო საშუალების მართვის გარდა).
  • ქუჩის იძულებითი ნარკოტესტირებების სამარცხვინო, მოქალაქეთა ღირსების შემლახავი პრაქტიკის შეწყვეტა.
  • პირადი მოხმარებისთვის მცირე ოდენობით კანაფის კულტივირებისთვის სისხლის სამართლებრივი და ადმინისტრაციული პასუხისმგებლობის გაუქმება.
  • სამედიცინო და სამეცნიერო-კვლევითი მიზნებისთვის კანაფის და კანაფისგან წარმოებული პროდუქტების გამოყენების დაშვება.