საქართველოს პარლამენტის ყოფილი თავმჯდომარე და ქართული ოცნების პოლიტსაბჭოს წევრი კახა კუჭავა მარიუპოლში საავადმყოფოს დაბომბვას ეხმაურება და ამბობს, რომ მსოფლიო ამ ბოროტების დასასრულებლად ერთად უნდა დადგეს.

"წარმოუდგენელია! გაუგონარი სისასტიკე! სამშობიარო და ბავშვთა საავადმყოფოზე თავდასხმა?! მსოფლიო ერთად უნდა დადგეს ამ ბოროტების დასასრულებლად!" — წერს ის.

გუშინ, 9 მარტს რუსმა ოკუპანტებმა მარიუპოლის სამშობიარო დაბომბეს. დაჭრილი და დაღუპულია რამდენიმე ქალი.

პარლამენტის ყოფილი თავმჯდომარე ჯერ კიდევ ქართული ოცნების გუნდშია. მმართველმა პარტიამ უკრაინასთან დაკავშირებული განცხადებების გამო, არაერთხელ მიიღო კრიტიკა როგორც საქართველოში, ასევე უკრაინელი პარტნიორებისგანაც.

პრემიერმინისტრმა, ირაკლი ღარიბაშვილმა არაერთხელ განაცხადა, რომ საქართველო რუსეთის მიმართ დაწესებულ სანქციებს არ შეუერთდება. მისი თქმით, რუსეთის სანქცირების შემთხვევაში, ფული, რომელიც საქართველოში შემოდის, "ხალხს მოაკლდება".

25 თებერვალს პრემიერმინისტრმა თქვა, რომ არავითარ საჭიროებას არ ხედავს უკრაინის საკითხზე პარლამენტში რიგგარეშე სხდომის მოწვევის და მას თავისი საქმე აქვს, პარლამენტსაც თავისი საქმე აქვს, ომი კი უკრაინაში მიმდინარეობს.

მოსახლეობამ ღარიბაშვილის განცხადება გააპროტესტა და ათასობით ადამიანი პარლამენტთან შეიკრიბა. ამის შემდეგ ზელენსკიმ Twitter-სა და საკუთარ ვიდეომიმართვაში ქართველ ხალხს მადლობა გადაუხადა და თქვა, რომ "არის დრო, როცა მოქალაქეები არ არიან მთავრობა, მაგრამ არიან მთავრობაზე უკეთესები".

28 თებერვალს უკრაინის პრემიერმინისტრმა დენის შმიგალმა ტვიტი 4 ენაზე გამოაქვეყნა და ქართველ ხალხს მიმართა — "თავისუფლებისმოყვარე ქართველო ხალხო, დაეხმარეთ თქვენს პრემიერს სწორი გადაწყვეტილების მიღებაში". პირველ მარტს კი ზელენსკიმ საქართველოდან უკრაინის ელჩი გაიწვია.