შინაგან საქმეთა მინისტრის, ვახტანგ გომელაურის განცხადებით, რუსული დამოუკიდებელი მედიის, დოჟდის ჟურნალისტის საქართველოში იმიტომ არ შემოუშვეს, რომ "რაღაც ვერ დააკმაყოფილა".

"ბევრი ადამიანი არ შემოვუშვით, 100-ზე მეტი, ერთ-ერთი, ალბათ, ეგეც მოყვა, არ ვიცი. ეს არის ჩვეულებრივი გაწერილი წესი, რომელსაც მესაზღვრე თვითონ წყვეტს, ვინ შემოუშვას, ვინ არ შემოუშვას, არც მინისტრი, არც მისი კურატორი მოადგილე და ა.შ. არის თვითონ მესაზღვრე, რომელიც იღებს გადაწყვეტილებას, შემოუშვას თუ არ შემოუშვას. აქ არის, როგორც რუსეთის მოქალაქე, ასევე, ბელარუსის, უკრაინის, გერმანიის და სხვა.

[...] ჩვეულებრივი სტანდარტული რაც არის, გაიდლაინი. ჩვეულებრივად ხდება სტანდარტულად არშემოშვება ადამიანის, არის კრიტერიუმები, თუ სად რჩება, ვისთან მიდის, აღებული აქვს ბილეთი, ბევრი რაღაც არის ჩამოწერილი და რაღაც ვერ დააკმაყოფილა", — განაცხადა შინაგასნ საქმეთა მინისტრმა.

რუსული დამოუკიდებელი მედიის, დოჟდის ჟურნალისტი, მიხეილ ფიშმანი საქართველოში არ შემოუშვეს. ჟურნალისტმა ჩვენთან შემოსვლა მას შემდეგ გადაწყვიტა, რაც რუსეთში, ამ მედიის წინააღმდეგ კრემლმა მორიგი შემზღუდავი ნაბიჯები გადადგა და დევნა გააძლიერა — მედიას მუშაობის შეწყვეტა მოუწია.

ფიშმანის თქმით, მისთვის არ აუხსნიათ საქართველოში შემოსვლის მიზეზი, თუმცა უთხრეს, რომ სურვილის შემთხვევაში, გასაჩივრება შეუძლია.