სახელმწიფო უსაფრთხოების სამსახურში ამბობენ, რომ რუსეთისა და ბელარუსის მოქალაქეების "უკონტროლო შემოდინება მიზანმიმართულად გავრცელებული დეზინფორმაციაა".

"მიმდინარეობს საზოგადოების დაშინება შემოსულ პირთა შორის ე.წ. დივერსანტების, ტერორიზმთან დაკავშირებული ჯგუფების და ა.შ. არსებობის შესახებ. სრული პასუხისმგებლობით ვაცხადებთ, რომ ქვეყანაში არსებული უსაფრთხოების გარემო სრულ კონტროლს ექვემდებარება.

სახელმწიფო უსაფრთხოების სამსახური სხვა შესაბამის უწყებებთან ერთად აქტიურ რეჟიმში ატარებს ყველა საჭირო ღონისძიებას, რათა მინიმუმამდე შემცირდეს შესაძლო რისკები და გამოწვევები, ასევე სრულად იქნას გაკონტროლებული ქვეყანაში მყოფი პოტენციური რისკის შემცველი ყველა პირი", — ნათქვამია განცხადებაში.

მათივე თქმით, გატარებული ღონისძიებების შედეგად ქვეყნის მასშტაბით მშვიდი და უსაფრთხო გარემოა შენარჩუნებული. სუს-ში აღნიშნავენ იმასაც, რომ ქვეყანაში მიმდინარე პერიოდში შემოსული ადამიანების რაოდენობა არ არის იმაზე მეტი, რაც გასულ წელს ამ დროს იყო.

"საქართველოს სახელმწიფო, ქვეყნის ტერიტორიაზე უცხო ქვეყნის მოქალაქის დაშვების სუვერენულ უფლებას ახორციელებს კანონმდებლობის სრული დაცვით, არსებული რისკებისა და გამოწვევების შესაბამისად", — ამბობენ ისინი.

რუსეთის უკრაინაში შეჭრისა და ამის გამო დაწესებული სანქციების შემდეგ რუსეთის მოქალაქეების ნაწილმა ქვეყანა დატოვა. მას შემდეგ, რაც გავრცელდა ინფორმაცია, რომ საქართველოში რუსეთის მოქალაქეები აპირებენ ჩამოსვლას, ამას საზოგადოების პროტესტი მოჰყვა. ბევრმა ადამიანმა, რომ მათთვის ბინების გაქირავებაზე უარს იტყვიან.

ქართული ოცნების თავმჯდომარემ, ირაკლი კობახიძემ საზოგადოების პროტესტს შოვინიზმისა და დისკრიმინაციის უხეში გამოვლინების კამპანია უწოდა. მისივე თქმით, პარლამენტმა კანონპროექტის გამკაცრებაზე დაიწყო მუშაობა, რომელიც ეთნიკური ნიშნით დისკრიმინაციისა და ეთნიკური შუღლის გაღვივების წინააღმდეგ იქნება მიმართული.

ეკონომიკის მინისტრმა, ლევან დავითაშვილმა 7 მარტს განაცხადა, რომ საქართველოს საზღვარი 20-25 000-მა რუსეთის მოქალაქემ გადმოკვეთა.