24 თებერვალს რუსეთი უკრაინაში შეიჭრა და სრულმასშტაბიანი ომი წამოიწყო, რომელიც დღემდე გრძელდება. რუსული აგრესია ქვეყნების გარდა, კომპანიებმაც გააპროტესტეს. უამრავმა კომპანიამ რუსეთს ბოიკოტი გამოუცხადა, მაღაზიები დახურა და ქვეყანაში პროდუქციის შეტანაზეც უარი განაცხადა.

ერთ-ერთი ასეთი შვედური კომპანია იკეაა, რომელიც ავეჯს, სახლის აქსესუარებსა და სხვა ნივთებს აწარმოებს. ცოტა ხნის წინ კომპანიამ გადაწყვიტა, თანამშრომლების უსაფრთხოებიდან გამომდინარე რუსეთში არსებული 17-ვე მაღაზია დროებით დაეხურა.

ფოტო: Konstantin Zavrazhin/Getty Images

განცხადების გამოქვეყნებიდან ცოტა ხანში მაღაზიებში უსასრულო რიგები დადგა — რუსები საჭირო ნივთების მოსამარაგებლად მოვიდნენ. მაღაზიებიდან უამრავი ფოტო და ვიდეო გავრცელდა, რომელთა ავტორების მიხედვით, თანამშრომლები მომხმარებლებს ეუბნებოდნენ, რომ დახურვამდე ყველას მომსახურებას ვერ მოასწრებდნენ, თუმცა ადამიანები რიგიდან ფეხს არ იცვლიდნენ. მაღაზიებმა მუშაობა 3 მარტს შეწყვიტეს.

ფოტო: Reuters

იკეას გარდა რუსეთში პროდუქციის შეტანაზე უარს Apple, Nike, H&M და სხვა ბრენდებიც აცხადებენ.