პრეზიდენტ გიორგი მარგველაშვილი მიიჩნევს, რომ კონსტიტუციაში ევროატლანტიკური კურსის ჩაწერა ადეკვატური ნაბიჯი არ არის. საკონსტიტუციო რეფორმასთან დაკავშირებულ საკითხებზე საქართველოს პრეზიდენტმა დღეს, კონსტიტუცია ყველასია კამპანიის ფარგლებში შეხვედრა ბათუმის შოთა რუსთაველის სახელმწიფო უნივერსიტეტში გამართა:

"ქართველი ხალხის ნება, ევროპულ და ევროატლანტიკური ინტეგრაციისათვის არის მთავარი გარანტი და არა ის ჩანაწერი, მითუმეტეს ჩანაწერი, რომელიც არის გარდამავალ დებულებებში. მე მრჩება შთაბეჭდილება, რომ ეს ჩანაწერი რაღაც პოლიტიკური შეთანხმების თუ პოლიტიკური დისკუსიის შედეგია. კონსტიტუციაში პოლიტიკური მიმართულებები, ამა თუ იმ ალიანსში გაწევრიანება შეიძლება ჩაგვეწერა, რომ მაგალითად, მსოფლიო სავაჭრო ორგანზიაციის წევრი უნდა ვიყოთ, ან გაეროს წევრი უნდა ვიყოთ. მიუხედავად იმისა, რომ ამ კურსის ძალიან ერთგული, მომხრე პოლიტიკოსი ვარ, კონსტიტუციაში არ მიმაჩნია რომ ეს უნდა ეწეროს".

საკონსტიტუციო კომისიის 18 აპრილის სხდომაზე, ქართულმა ოცნებამ ცვლილებების პროექტის ის ნაწილი წარადგინა, სადაც აღნიშნულია, რომ კონსტიტუციით გაიწერება ევროპულ და ევროატლანტიკურ სტრუქტურებში გაწევრიანება.