საქართველოს პრემიერმინისტრმა, ირაკლი ღარიბაშვილმა კიდევ ერთხელ გაიმეორა, რომ რუსეთისთვის სანქციების დაწესებას არ აპირებს, რადგან მისი მტკიცებით, ეს "ეროვნულ ინტერესებს" დააზიანებს. ღარიბაშვილი ამბობს, რომ რუსეთის სანქცირების შემთხვევაში, ფული, რომელიც საქართველოში შემოდის, "ხალხს მოაკლდება".

"მინდა, რამდენიმე მაგალითით ჩვენს მოსახლეობას შევახსენო, რას ნიშნავს ჩვენთვის და რას ნიშნავდა რუსეთის ბაზრის გახსნა, რომელზეც სააკაშვილი, ომის შემდეგ, დაჟინებით მუშაობდა ამ საკითხზე, მაგრამ ვერ მიაღწიეს.

ძალიან მოკლედ რომ გითხრათ, 2013-2021 წლებში საქართველოდან რუსეთში ექსპორტირებულია ჯამში 2 მილიარდი დოლარის აგრო სასურსათო პროდუქცია. სხვა პროდუქციის ექსპორტი ჯამურად შეადგენს 3 მილიარდ დოლარს.

ასევე მინდა გითხრათ, რომ ჯამურად ღვინის ექსპორტის ღირებულებამ შეადგინა 865 მილიონი დოლარი — ეს ყველაფერი გახსოვთ, რომ დაკეტილი იყო და გახსოვთ, როგორ ექცეოდნენ ჩვენს ფერმერებს, მევენახეებს, საკუთარ ქართველ კაცს, რომელიც არის ღვინის სამშობლო და აკვანი, ვენახის გაჩეხვას აიძულებდნენ.

ამის შემდეგ, ტურიზმიდან ჩვენმა ქვეყანამ ბოლო 5 წელიწადში 3 მილიარდი დოლარი მიიღო შემოსავლის სახით და 5 მილიონზე მეტი რუსი ვიზიტორი შემოვიდა საქართველოში.

ნუ დაგვავიწყდება ნურავის, რომ 1 მილიონი ქართველი, საქართველოს მოქალაქე ცხოვრობს რუსეთში და ყოველ წლიურად, საშუალოდ, გადმორიცხვების ჯამური ღირებულება შეადგენს, დაახლოებით, 500 მილიონს, ანუ ჯამურად ბოლო წლებში სამი მილიარდი შემოვიდა რუსეთისგან, გადმოირიცხა ჩვენი მოქალაქეების მხრიდან.

ჯამურად ეს რომ მოვთავლოთ, ეს გამოდის 12 მილიარდზე მეტი ამ ბოლო 7-8 წელიწადში. ამიტომ, მე კითხვას ვსვამ, მეგობრებო. როცა საუბარია სანქციების დაწესებაზე და რა თქმა უნდა, მე მინდა ვთქვა, რომ ამ ყველაფერში ჩართულია თითქმის მთელი მოსახლეობა — ათასობით მეღვინე, ექსპორტიორი, ფერმერი, ყველა არის ჩართული ამ პროცესში.

ანუ რას მთხოვენ? რომ საკუთარ ხალხს დავუწესოთ სანქციები? ეს ვის მოაკლდება, ეს ყველაფერი, შემოსავალი? მოაკლდება ჩვენს ხალხს, ჩვენს მოსახლეობას, ჩვენს ეკონომიკას, დაიჩაგრება ჩვენი 1 მილიონი თანამოქალაქე, რომლებიც ვეღარ შეძლებენ ფულის გადმოურიცხავს, თუ გავურთულებთ მათ ფინანსურ ოპერაციებს. ამიტომ, მე მინდა აღვნიშნო, ეს ზედმეტი ემოციები არაფრის მომცემი არ არის, პირიქით, ეს არის საზიანო ჩვენი ეროვნული ინტერესების", — თქვა მან.

25 თებერვალს ღარიბაშვილმა განაცხადა, რომ საქართველო რუსეთს ფინანსურ და ეკონომიკურ სანქციებს არ დაუწესებს. მისი მტიცებით, ეს გადაწყვეტილება ქვეყნის ეროვნულ ინტერესებს ეფუძნება.

ამავე დღეს პრემიერმინისტრმა თქვა, რომ არავითარ საჭიროებას არ ხედავს უკრაინის საკითხზე პარლამენტში რიგგარეშე სხდომის მოწვევის და მას თავისი საქმე აქვს, პარლამენტსაც თავისი საქმე აქვს, ომი კი უკრაინაში მიმდინარეობს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში