დიდმა ბრიტანეთმა რუსეთს ახალი სანქციები დაუწესა. პრემიერმინისტრმა, ბორის ჯონსონმა სანქციების ახალი პაკეტი ახლახან გამოაცხადა:

  • ყველა მსხვილ რუსულ ბანკს გაეყინება აქტივები. ისინი გაირიცხებიან დიდი ბრიტანეთის ფინანსური სისტემიდან. ეს მოიცავს VTB ბანკის სრულ და დაუყოვნებლივ გაყინვას;
  • მსხვილ რუსულ კომპანიებსა და სახელმწიფოს აღარ შეეძლებათ, მოიზიდონ ფინანსები და აიღონ სესხი ბრიტანეთიდან;
  • აქტივები გაეყინება 100 ახალ ფიზიკურ თუ იურიდიულ პირს;
  • ავიაკომპანია Aeroflot-ს დიდ ბრიტანეთში ფრენა ეკრძალება;
  • შეჩერდება ორმაგი დანიშნულების საექსპორტო ლიცენზიები, რათა არ მიუწვდებოდეთ ხელი იმაზე, რაც სამხედრო მიზნებისთვის შეიძლება გამოიყენონ;
  • რამდენიმე დღეში დიდი ბრიტანეთი შეაჩერებს მაღალტექნოლოგიური ნივთებისა და ნავთობგადამამუშავებელი ტექნიკის ექსპორტს;
  • იქნება ლიმიტი დეპოზიტებზე, რომლითაც რუსებს შეუძლიათ გაერთიანებული სამეფოს საბანკო ანგარიშებზე ოპერაციები განახორციელონ;
  • ჯონსონის თქმით, არსებობს პოტენციალი, რომ რუსეთი ამოიღოს Swift-ის გადახდებიდან და "არაფერია გამორიცხული";
  • მსგავსი ფინანსური სანქციები გავრცელდება ბელარუსზეც, მისი როლის გამო უკრაინაზე თავდასხმაში;
  • დიდი ბრიტანეთი სააღდგომო არდადეგებამდე წარადგენს ეკონომიკური დანაშაულის კანონპროექტის ნაწილებს.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს. უკრაინული მედიისა და სახელმწიფო სტრუქტურების ინფორმაციით, თავდასხმები ხორციელდება არაერთ ქალაქში და იბომბება დასახლებული პუნქტები, მათ შორის კიევში. უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა და მოუწოდა ხალხს, არ აჰყვნენ პანიკას.

სიტუაცია მუდმივად იცვლება. ზელენსკი ამბობს, რომ რუსული საოკუპაციო ძალები ჩერნობილის ატომური ელექტროსადგურის რადიაციულ ზონაში შევიდნენ. იზრდება დაღუპულთა რიცხვიც — ხერსონის ოლქში დაბომბვის შედეგად დაიღუპა 13 ადამიანი, მათ შორის 2 ბავშვი და 9 სამხედრო მოსამსახურე. კიევთან ახლოს რუსეთის თავდასხმას კი 7 ადამიანი ემსხვერპლა.

გარდა ამისა, CNN ადგილზე მყოფ ჟურნალისტზე დაყრდნობით წერს, რომ რუსულმა საჰაერო-სადესანტო ძალებმა კიევთან ახლოს მდებარე ანტონოვის აეროპორტზე კონტროლი აიღეს.

გაიგეთ მეტი: